MGA opisyal sa Philippine Drug Enforcement Agency (PDEA) dili pa gihapon maka-kompermar nga ang gikatahong namatay sa Quezon City niadtong Abril 18 ning tuiga mao ba gyud si Franz Sabalones, ang inilang drug lord sa Sugbo.
Matod ni Thessa Tiuzen, ang deputy director sa PDEA Central Visayas, nga sa pagkakaron, wala pa silay ebedensya nga patay na si Sabalones bisan pa man nga migawas na kini sa media sa kaulohan.
Wala usab matod pa silay gihuptan nga death certificate nga namatay na si Sabalones.
Padayon ang ilang pag monitor kung buhi pa ba kini o kadtong namatay sa kaulohan mao ba gyud si Sabalones.
Samtang, 30 ka kilos sa shabu nga naa sa Philippine National Police Crime Laboratory ang gitakdang sunogon sa APO-Cemex Plant sa dakbayan sa Naga karong Disyembre 10, 2019.
Matod ni Police Colonel Roderick Pausal, hepe sa Philippine National Police Crime Laboratory, nga ang maong mga illegal nga drogas nga gitakdang sunogon mao kadtong aduna nay desisyon sa korte ug ang uban mga mga akusado namatay na. (Superbalita Cebu)