TALIWALA sa daghang pagsaway, takos gihapon sa pagdayeg ang tagdumala sa Cebu South Bus Terminal (CSBT) nga ginag-iya sa kagamhanan sa lalawigan sa Sugbo tungod sa makanunayong pagpatuman sa mga kausaban pahiuyon sa tawag sa panahon.
Niadtong unang administrasyon ni Gobernador Gwendolyn Garcia, ang waiting area sa terminal gihimong airconditioned ug ang paging system gipalambo. Apan wala kini namintinar dihang nawala siya sa posisyon. Ninayhinay pagbalik ang mga naandang problema.
Karong nabalik na siya sa pwesto sa lalawigan, ang luwas ug komportable nga CSBT iyang gipatutokan pagbalik. Dili pa lang dugay, laing lakang ang gipatuman aron pagkonrolar sa mga tawo sa terminal pinaagi sa “no ticket, no entry” policy.
Sa unang mga adlaw sa pagpatuman niini, masabtan nato nga dunay daghang pagsaway human nakalitan sa sistema nga anha na sa gawas molukat og tiket. Hinuon, balido usab ang mga reklamo human walay tarong nga pagpangandam bisan sa habig sa bus operators.
Karong bag-o, ang giuyonan sa gobernador sugyot sa mga opisyal sa bus liners sa pagpatuman sa boarding pass, alternatibo nga pamaagi aron makasulod na sa waiting area ug maluagan ang pagpunsisok sa daghang tawo sa gawas sa terminal o habig sa dalan N. Bacalso sa dakbayan sa Sugbo.
Apan ang gobernador nihagit sa iyang gisaligan sa pagdumala sa terminal nga padayong mangita og laing solusyon kon magpadayon ang problema. Usa sa iyang gikonsiderar sa pagbutang og ticketing center sa entrada sa terminal.
Dalaygon ang padayong pagpangita og kausaban sa terminal nga gitumong sa kaluwasan ug kahamugaway sa mga pasahero. Suportahan nato ang CSBT nga mahimong ehemplo sa tanang bus terminals. susama kahamugawsay sa airport terminal. Mahimong world-class. Go, Gov.