NAGKA-TENSYON ang sesyon sa Sangguniang Panlalawigan (SP) niadtong adlaw’ng Lunes, Nobiyembre 18, human gikwestyon sa pipila ka majority nganong wala gidawat sa buhatan ni Bise Gobernador Jigjag Pelaez ang proposed nga annual budget alang sa lalawigan sa Misamis Oriental.
Matud ni Board Member Gerardo Sabal nga nadismaya siya pagmaayo nganong wala gidawat niadtong Biyernes, Nobiyembre 15, sa mga empleyado ug samot nga iyang gikalagot ang pag-picture pa sa maong dokumento.
Usa ka staff sa bise gobernador nga si Junel Bagporo gigisa ni Sabal og pangutana atol sa sesyon ug gipatubag tubag niini nganong wala kini midawat sa importanteng dokumento. Gidepensahan sab kini ni Pelaez.
Si Board Member Wayne Militante nipaabot sab ngadto kang Pelaez nga unta dili langanon sa pag-aprobar kay plastada na ang budget ug aprobado na sa local finance committee.
“The annual budget is very important to our province in Misamis Oriental and you cannot just refuse because it is our project. If it has not any objection, then the budget must go on,” kini sab ang sulti ni Board Member Nancy Madjos.
Atol sa flag raising, namahayag si Governor Bambi Emano nga nasubo siya sa wala pagdawat sa provincial board sa annual budget.
“I am very sad because ang Sangguniang Panalalawigan (SP) refused to accept the budget. Last Friday, the budget was submitted, the annual budget. And yet it was refused, wala gidawat,” matud ni Emano
“After election, they were talking of working together. And earlier, they were saying nga ako kuno ang galangan-langan,” dugang niini.
Atol sa sesyon, pormal nga gidawat ni Pelaez ang proposed budget ug miingon kini nga gikinahanglan lamang niya ang transmittal letter aron moagi sa proseso.
“Naa pay tulo ka sesyon. Majority man kamo, dili mahimong dili kana ma-aprobahan. Ma-aprobahan kana,” matud ni Pelaez.
Dugang niini nga iya pa tinagsahon og tan-aw kon asa ang gipang slash nga budget kay niabot kaniya nga giubsan og maayo ang budget sa SP.
“Ako pa tan-awon sa ilang gipa-receive ug pirmahan nato matag page para makita. Unya pata mabalo pila’y gi slash sa atong budget. Kung naa man, Merry Christmas!” sulti ni Pelaez.
Gisabot sab niini ang opinyon sa iyang mga kauban sulod sa SP.
“Nagkalain lang ang mga opinion, pero in the end nagkasabot raman gihapon. Naa man gyud ingon ana. This is a healthy discussion. Usa kita ka demokrasya nga nasod,” dugang sa bise gobernador.
Giklaro sab niini nga dili mahimong dili ma-aprobahan ang annual budget ug gikatakda kini sunod sesyon.
“That is very clear...my manifestation has to have it calendared for the next regular session and most probably we will approved it by majority votes. That’s the time the public will know kung asa nga opisina ang napahakan,” matud ni Pelaez.