BAG-ONG estratehiya ang planong buhaton sa lokal nga kagamhanan sa dakbayan sa Cagayan de Oro sa pagpatuman sa kamandoan ni Presidente Rodrigo Duterte sa pagbalik sa mga kadalanan.
Gibutyag ni acting City Administrator Teodoro Sabuga-a nga kinahanglan nga mangita og bag-ong estratehiya aron nga dunay makitang nahuman.
“We have to strategize. So nakita nato nga ang national road gamay lang. So nganong di man ta mag-focus sa national road para close na dayon ta diha? Ang buhaton nalang dayon maintenance nalang,” matud ni Sabuga-a.
Buot usab niini nga isunod ang sa siyudad ug ang ikatulo mao ang sa barangay.
Giingong nakigtagbo na kini sa tinugyanan sa Department of Public Works and Highways (DPWH) kabahin niini.
Gidugang pa niini nga mahuman kini ilabi na kung molihok ang matag barangay nga maoy dunay dakong papel kalabot niini.
‘Ang yawe sa road clearing diri ang barangay gyud nga dili gyud nila i-allow na. Mao ra gyud na. Pag di na nila i-allow kay mahibaw-an man gyud,’ dugang pa.
Kahinumdoman nga nagsugod ang lokal nga kagamhanan sa siyudad sa kampanya o sa road clearing sa bulan sa Hulyo base na usab sa hangyo sa matag barangay ug angayang unahon.