PATAY ang usa ka 50 anyos nga lalaki human gipusil niadtong Sabado, Nobiyembre 16, sa Barangay Tugaya, Valencia City, Bukidnon.
Giila ang biktima nga si Romeo Tilen, 50, minyo, lumad sa Barangay Barobo, susamang dakbayan.
Sa inisyal nga imbestigasyon sa Valencia City Police Station sa pagpangulo ni Police Lieutenant Colonel Surki Sereñas, nasuta nga kining biktima sakay sa iyang motorsiklo gikan sa ilang puloy-anan ug paingon na unta sa iyang trabahoan.
Apan mga tunga sa kilometro gikan sa puloy-anan niini, kalit kining gipusil makapito ka higayon hinungdan nga dead on the spot.
Narekober sa crime scene ang pito ka fired cartridge cases sa kalibre .45 ug laing upat ka mga basyo sa bala sa susamang kalibre.
Gitumbok nga suspetsado si Leovy M. Batistil, 39, ulitawo, taga Barangay Tugaya, susamang siyudad kinsa gitumbok nga sakop sa Batistil Criminal Group.
Misibat kining suspek ug wala ra naabtan og hapon nadakpan kini sa kapulisan ug karon tingkagol na sa prisuhan.