TACURONG CITY - Patay ang usa ka mag-uuma nga gipusil sa mga armadong tawo alas 2:15 sa hapon niadtong Sabado, Enero 26.
Giila ang biktima nga si Venancio Frandisca, 44 anyos, minyo ug nagpuyo sa Sitio Egam, Brgy. Datu Ito Andong, Kalamansig, Sultan Kudarat.
Sa taho gikan sa Sultan Kudarat Police Provincial Office nga samtang didto sa iyang uma ang biktima kalit lang mibutho ang wala mailhing mga armadong lalaki ug gipusil kini gamit ang M16 armalite rifles.
Patay ang mag-uuma nga natusak-tusak sa bala sa nagkadaiyang parte sa iyang lawas.
Miikyas sab ang mga suspek nga gikatuohang nga mga miyembro sa New People's Army (NPA) ubos sa Guerilla Front Committee 73.
Ang biktima giakusahan sa mga NPA nga maoy misumbong sa mga sundalo sa ilang gilubluban nga gisulong sa Marine Battalion Landing Team (MBLT-2).
Sa kasamtangan, ang kapulisan sa Kalamansig padayon nga nag-imbestiga sa pagpatay sa biktima. (Edgar Fuerzas)