SUPERBALITA CEBU

4 ka mga sundawo patay sa aksidente sa Samar

PATAY: Mga lawas sa mga sundawo nga nangamatay sa bangga gipangtabunan sa may dapit nga nahitaboan sa bangga sa lungsod sa Paranas. (Tampo ni Police LT. COL. Bella Rentuaya, PIO-PRO 8)

PARANAS, Samar - Upat ka mga sundawo nangamatay samtang pito ang nangaangol sa aksidente sa dalan sa Barangay Apolonia ning lungsod, alas 9 sa buntag, Martes, Nobiyembre 19, 2019.

Usa sa mga nakalas opisyal sa Philippine Army.

Base sa report sa Police Regional Office (PRO) 8, ang upat nga nangamatay mao sila si Staff Sergeant Crisostomo Gabuay; Sergeant Sherwin Antonio; Sergeant Rommel Ombrog ug ang opisyal nga si 2nd Lieutenant Charife Cananog.

Samtang ang laing pito nga naangol mao sila si Lieutenant Colonel Edgar Allan Orbito, Sergeant Abadiano mga sibilyan nga sil Mat Raymond Barante, Warren Dabut, Janica Obidos Baco, Jella Bacay Baccol ug Sheryl Sayasa Maurillo.

Sa inisyal nga imbestigasyon, ang wing van nga dunay plakang UVZ 951 gimaneho ni Elvin Millanes ug ang usa ka traysikol nga gimaneho ni Warren Dabuet pareho nga nagbiyahe sa samang direksyon.

Samtang ang Toyota Hilux nga may plakang TU 0962 nga gisakyan sa mga sakop sa Philippine Army nagbiyahe kasugat sa duha ka mga sakyanan.

Nasayran nga nag una ang traysikol sa wing van apan, pag abot sa lugar nga nahitaboan, nabanggaan sa wing van ang traysikol ug milahos sa kasugat nga Hilux.

Gidaro sa wing van ang Hilux ug nadasok sa usa ka balay.

Dead on the spot ang upat ka sundawo samtang naangol ang uban mga kauban ug mga sibilyan nga sakay sa traysikol nangalagpot.

Gidala sa Rural Health Unit ning lungsod ang upat ka mga patay samtang gidala sa lahi nga tambalanan ang mga samdan.

Naa na sa kustodiya sa kapulisan ang drayber sa wing van ug ang mga sakyanan nga nalambigit.

Sa paghimo ning balita, padayon pa ang imbestigasyon sa kapulisan sa insidente.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph