NAG-atubang hinuon og kaso sa paghupot ug pagdala sa armas nga way lisensya ang usa ka security guard nga igo lang miuban sa kauban niya nga gwardiya sa Siyudad sa Sugbo aron mopalit og uniporme sa usa ka tindahan sa dan Colon.
Katarungan sa security guard nga nakalimot siya sa pagbilin sa iyang armas.
Matod pa ni security guard Marvin Estacion nga human na ang iyang oras sa pag duty sa usa ka pawnshop sa Dakbayan sa Talisay, iyang gikuyogan ang iyang kauban sa trabaho nga mopalit og uniporme mga alas 4 sa Lunes sa hapon, Nobiyembre 18, 2019.
Matod niya nga wa siya makabantay nga iyang nadala ang iyang .38 caliber revolver nga iyang gamit personal.
Nakalimot siya sa pagbilin sa armas nga iyang nasulod sa bag.
Si Police Major Joemar Pomarejos, hepe sa Waterfront Police, niingon sa Superbalita Cebu nga nadakpan si Estacion sa usa ka secuity guard nga nagbantay sa department store.
Padulong na mosulod si Estacion kini kuyog sa kaubang gwardiya.
“Pagsulod man gud niya, gipaabli ang iyang dala nga bag ug didto sa sulod sa bag nakit-an ang armas,” matod ni Pomarejos.
Matod pa ni Pomarejos nga ang gwardiya nga si Rian Ferolino, 29, taga Barangay Guadalupe, nakabantay sa armas nga anaa sa sulod sa bag sa suspek.
Gipanguyoan ni Ferolino og mga papeles apan, way gipakita si Estacion hinungdan nga nangayo na og pakitabang sa mga pulis nga anaa sa gawas sa tindahan.
Si Estacion niangkon hinuon nga way mga lisensiya ang iyang armas.
“Nagtuo gyud ko, Sir, nga nabilin nako, wala ko kadumdum nga naa ra man diay sa akong bag,” pulong pa sa dinakpan. (BBT)