GITAGALAN ni Gobernador Gwendolyn Garcia ang mga tag-iya og illegal structures sa Kawasan Falls sa pagguba niini.
Ang tagal molanat hangtod sa Nobiyembre 30, 2019.
Personal nga susihon sa gobernador ang report nga gihimo sa Provincial Engineering Office (PEO) ug Provincial Environment and Natural Resources Office (Penro) kabahin sa clearing operation sa mga estruktura nga ilegal nga nahiluna sulod sa 20-meter easement zone sa Kawasan Falls sa lungsod sa Badian.
Atol sa pagsusi sa Penro sa busay, may 32 ka mga sementado nga cottages, 16 ka mga kasilyas nga may 18 ka mga septic tanks, upat ka dressing room ug 77 ka mga picnic sheds ang misupak sa balaod.
Matod ni Garcia nga atol sa pakighinabi niya sa mga nanag-iya sa mga estruktura, miuyon kini nga tangtangon nila ang mga milapas nga structures.
“Because my understanding is katong dinhi ang mga structure owners, they gave that commitment nga ila na tangtangon,”, matod ni Garcia niadtong Nobyembre 18, 2019.
Dugang niya nga kinahanglan niya nga susihon usab kon gawas sa kalapasan niini sa balaod, may laing kalapasan ba kini.
“Should we encounter problems, we know what to do, whether they pay hefty fines and penalties and we can always clear the illegal structures,” matod ni Garcia.
Ang Kawasan Falls usa ka three-level waterfalls nga nahimutang sa Barangay Matutinao, lungsod sa Badian, nga maoy usa sa sagad duawon sa mga turista kon motabok sa habagatang bahin sa Sugbo.