GIHAGIT sa Philippine Drug Enforcement Agency (PDEA) 7 ang mga opisyal sa Sangguniang Kabataan nga motagana og pundo ingon man programa alang sa kampanya batok sa ilegal nga drugas ngadto sa out of school youth.
Kon nasukip na sa nagkadaiyang curriculum sa Department of Education ang kaalam aron malikayan kining malambigit ang kabatan-onan sa kadaot sa ilegal nga drugas, gusto usab sa PDEA 7 nga mahatagan og pagtagad ang out of school youth.
“Actually kaning SK nato they are members of the Barangay Anti-Drug Abuse Council (Badac). So being members of Badac, they have big responsibility in assisting our illegal drug campaign,” matod sa tigpamaba sa PDEA 7 nga si Leia Alcantara.
Dugang ni Alcantara nga kining mga programa sa SK susama sa sports activites o kining paliga sa basketball ug volleyball usa kini sa makatabang nga mahilayo ang out of school youth sa epekto sa ilegal nga drugas.
“That’s also what we are encouraging kay ang SK naa gyud na sila’y budget for programs, unta magahinan nila og budget.”
Usa usab sa mamahimong buhaton sa SK kining makigpartner kini sa PDEA 7 alang sa lectures ug drug summit aron sila mismo mamahimo na nga makapahigayon og lectures alang sa mga batan-on sa ilang barangay.
Si P/Lt. Col. Maria Aurora Rayos, tigpamaba sa Police Regional Office (PRO) 7, nagkanayon nga anaa usa sa values sa pamilya kon mahaduol kini sa maong klase sa bisyo. (HBL)