GIBANA-bana nga 20 ngadto sa 30 kilos nga shabu nga naa sa kustodiya sa PNP Crime laboratory 7 ang gitakdang sunugon pinaagi sa paglunod sa incineration sa usa ka planta sa semento nga nahimutang sa siyudad sa Naga, karong Desembre 10.
Gipasabot sa Regional Chief sa PNP Crime lab 7 Police Colonel Roderick Pausal nga ang mga ebedensya nga sunogon sa sunod buwan mao kadtong aduna nay desisyon ang korte ug ang mga tag-iya niini patay na o namatay sa anti drug operation.
Atol sa gipatawag nga tigum ni Governor Gwendolyn Garcia uban sa kapulisan, PDEA ug sa mga huwes sa Regional Trial Court sa siyudad sa Sugbo ilang gituki ang pagsunog na sa mga ebidensya nga naa sa kustodiya sa mga otoridad, aron paglikay sa pagduda sa publiko nga gibalik ra kini sa karsada.
Nagpadayon pa ang inventory sa PNP Crime laboratory apan gibutyag ni Police Colonel Pausal adunay 170 kilos sa shabu ug lakip na marijuana ang naa sa ilang evidence room nga nasakmit sa kapulisan sukad pa niadtong tuig 1970.
Tungod sa maong kalamboan nga gi-uyonan sa korte ug ubang ahensya sa gobyerno nga magsunog na silag mga ebedensya sa illegal nga drugas maka usa sa tulo ka buwan gikalipay kini sa PNP Crime laboratory.
“Kami sa PNP ganahan mi ana kay para ang mga droga nga naa sa amoa nga kostodiya mawala pud, kay daghan na baya diha sa amoa nga mga ebidensya. Kung mapadayon ni siya kada quarter ganahan mi ana para gamay nalang gyud.” Matod ni Police Colonel Roderick Pausal.
Dugang ni Colonel Pausal nga sa mosunod nga mga buwan adunay high tech nga makina nga moabot sa ilang buhatan nga mao ang Gas Chromatography–Mass Spectrometry.
Ang maong makina maoy mo profile sa illegal nga drugas nga masakmit sa kapulisan kung asa kini gikan ug mosuta kung usa lang ba ang gigikanan niini nga supply.
Nabantayan sa kapulisan ug sa PDEA 7 nga nagka taas ang kalidad sa illegal nga drugas nga mo sulod sa Central Visayas nga nagpasabot nga wala himo-a dinhi ang shabu itandi niadtong naa pa sa Mandaue ang mega shabu laboratory. (AYB)