SUPERBALITA CEBU

Chan nanghinaut nga Akhro, pulis magpasayloay

NANGHINAOT si Lapu-Lapu City Mayor Junard Chan nga kon mahimo magpinasaylo-ay ang mga sakop sa Police Station 3 sa Lapu-Lapu City Police Office LCPO ug Alpha Kappa Rho Akhro nga nalambigit sa kagubot gawas sa City Auditorium niadtong kaadlawon sa Nobiyembre 17, 2019.

Alang sa mayor, subo palandungon ang insidente sanglit naatol kini sa usa sa nightly activities sa nagsingabot nga kapistahan sa patron sa Lapu-Lapu, ang Birhen sa Regla.

Iyang gihulagway ang duha ka habig nga adunay dakong papel sa kaayuhan sa dakbayan.

Ang kapulisan nga maoy gisaligan ni Chan sa peace and order ug ang Akrho nga mao usab ang gisaligan sa mayor panahon nga adunay mga kalamidad ug ubang kalihukan ang kagamhanan ngadto sa komunidad diin anaa sila kanunay nga mosuporta.

Kagahapon gipasaka na sa Lapu-Lapu City Prosecutor’s Office ang kasong drunkenness, resisting arrest ug disobedience, direct assault ug obstruction of apprehension sa duha ka sakop sa Akrho nga sila Paul Jay Pogoy ug Danilo Taghoy subay sa ilang giingong pag-interbener sa usa ka police operation.

Ang mga sakop usab sa Police Station 3 nga sila si P/SSgt. Adrian Yonting, Chief Master Sergeant Rodrigo Inoc, P/SSgt. Lexter Alvario ug P/Cpl. John Paul Sojor pulos na usab gipangrelibohan sa pwesto samtang nagpahigayon na og imbestigasyon ang LCPO.

Ang buhatan ni Chan mipahigayon na usab og kaugalingong imbestigasyon sa hitabo diin sila si Konsehal Rex Mangubat ug Janvi Dela Serna ang mangulo niini aron pagwagtang sa pagduda sa publiko sa dagan sa imbestigasyon.

Ang duha ka konsehal uban ang mayor diha ra usab sa sulod sa auditorium dihang nahitabo ang kagubot sanglit mitambong sila sa gipahigayong Youth Night.

“I am appealing to them if we can settle this amicably in honor of our patron saint Birgen sa Regla. Kita nagsaulog sa kapistahan para maglingaw ta, maglipay ta. Dili ta gusto nga magkagubot ang atoang kapistahan. We are just one family, one Oponganon,” matod ni Chan.

Samtang tun-an pa usab sa mayor ang pagpatuman og liquor ban sunod tuig nga mga kalihukan sa kapistahan aron kalikayan ang mga kagubot hilabi na nga maoy gitumbok hinungdan sa lamok-lamok nga nahitabo.

Gibutyag sa mayor nga gawas sa kagubot nga nahitabo tali sa mga pulis ug Akhro, adunay kagubot sa sulod diin siya mismo nakasaksi uban sila si Mangubat ug Dela Serna gumikan usab sa pag-inom sa ilimnong makahubog.

Kon dili ipatuman ug liquor ban mas maayong idili na lang ang pagpasulod ug ilimnong makahubog nga gisulod sa botelya aron kalikayan ang magkainitay ang mga manambong sa kalihukan.

Mibisita sa buhatan ni Chan ang tulo sa upat ka mga pulis nga girelibohan aron mopadangat sa ilang habig sa hitabo ngadto sa mayor.

Subay kini sa iyang gipahigayong kaugalingong imbestigasyon.

Kasamtangang gihuwat sa mayor ang habig na usab sa duha ka sakop sa Akrho.

Si P/Col. Clarito Baja, hepe sa LCPO, mipadayag nga kon siyay pabut-on mas maayo nga adunay liquor ban nga ipatuman sunod tuig. (GCM)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph