MGA tigmotorsiklo ug mga driver nga moagi sa kadalanan sa bisan asa nga dapit sa Dakbayan sa Talisay gikinahanglan nga magdala og ilang kaugalingon nga chalk, crayon o bisan unsa nga pang-marking.
Kini aron maoy magamit sa pag-sketch sa porma sa ligid sa ilang sakyanan ug mismo sa sakyanan kon ugaling makaangkon og kadaut nga menor sa disgrasya sa bisan asa nga dalan sa dakbayan sa Talisay.
Tumong niini mao nga madali ang pagkuha sa mga sakyanan nga nalambigit sa aksidente, sa ingon di makamugna og trapiko.
Daghan sa mga askidente nga menor lang ang kadaut apan, dako na kaayo og purhesyo sa trapiko.
Estrikto na unya kini nga ipatuman kon mapasar na ang gipanday nga ordinansahon ni Talisay Konsehal Ferdinand Rabaya.
Kini maoy gipahibawo ni Talisay City Traffic czar, Jonathan Tumulak.
Ang ordinansahon anaa na sa first reading aron mapuno sa traffic code sa Siyudad sa Talisay.
“Gitawag kini og sketch ordinance, iapil ni siya sa atoang traffic ordinance, ang maong sketch ordinance nga ang matag driver nga nagdala og sakyanan nga mosud sa syudad sa Talisay ang kinahanglan nga magdala na sila og chalk, crayons or any markings nga ilang magamit, ilang mabadlis diha sa dan. Subay sa maong ordinansa, ang maong mga involved sa bangga, gimanduan nga maoy mohimo og sketch sa ilang mga sakyanan pinaagi sa pagbadlis sa porma sa ilang ligid, badlis sa porma sa ilang sakyanan,” pagpasabot ni Tumulak.
Ang mga involved nga driver mao na usab ang mokuha og hulagway, diin kinanglan upat ka angle: atubangan, luyo ug isig ka kilid.
Ang Provincial Board duna usay ordinansahon nga giduso ni PB Member Glen Soco nga nagmando sa mga driver sa minor road accidents sa pagkuha og hulagway sa mga sakyanan nga nalambigit.
Tumong niini nga daling makuha ang mga sakyanan ug di makamugnag trapiko.
Nakabantay si Soco nga usa kini sa mga suliran nga nakatampo sa kahuot sa trapiko sa Sugbo.
Dugang ni Tumulak nga kinahanglan usab nga mokuha og hulagway ang matag driver nga distansya ang gilayo-on aron makita ang kinatibuk-an nga porma sa sakyanan atol sa panagbangga, nga makita usab ang markings sa da’n.
Gitug-an usab ni Tumulak nga kon ang usa ka motorist o driver nga way dala nga pang-marking atol sa disgrasya, lain kini nga violation, diin mamahimo sila nga ma-isyuhan og citation ticket.
“Kon pananglitan nga dugay giibot ang panagbangga, another violation. Kinahanglan nga kon dunay involved sa panagbangga, badlisan ug ilang ipadaplin dayon ang mga sakyanan,” saysay ni Tumulak.
Ang ordinansahon gipanday human nga nakita nga kon adunay panagbangga mahitabo, mohinay ang dagan sa mga sakyanan, o mohuot ang trapiko, kay maalihan man ang pipila ka mga lane.
Ang ordinansahon alang lang niadtong disgrasya sa dan nga sama sa natapsingan og dumbol, nga way involved nga major nga mga injuries o aduna gyud namatay.
“Kon mapasar na ang ordinansa, mahitabo ma-pull out dayon nila ang sakyanan, mapadaplin, while magpaabot sila sa pulis nga mo-responde, alang sa investigation. Kon dunay patay o grabe nga damages, kana maoy ihuwat sa PNP, kanag ginagmay lang, tapsing, dumbol, kana kay usa sa hinungdan nga mohuot ang trapiko, ilabi na diri sa Cebu South Coastal Road,” dugang pagpasabot ni Tumulak.