PADAYON ang pagkulit sa batan-ong Luka Doncic og pangalan sa National Basketball Association.
Kagahapon, ang 20-anyos nga taga Slovenia miposte og laing triple-double nga performance pinaagi sa iyang 42 puntos, 11 ka rebounds ug 12 ka assists aron ituboy ang Dallas Mavericks ngadto sa 117-110 nga kadaugan batok sa San Antonio Spurs.
Sa iyang pangidaron nga 20-anyos ug 263 ka adlaw) siya karon ang ikaduhang pinakabatang player sa NBA nga naka-triple double nga ang puntos 40 sunod ni LeBron James. Niadtong April 9, 2005, si James nga 20-anyos ug 100 ka adlaw pa ang panuigon, nakapugnit og 40 puntos, 10 ka rebounds ug 10 ka assists.
Mao usab kadto ang ikaunom nga triple-double ni Doncic sa 2019-2020 season nga nakapasaka sa iya usab nga average ngadto sa 29.5 points, 10.7 rebounds ug 9.3 assists.
Ang kadaugan maoy ikawalo sa Mavs sulod sa 13 ka duwa ug sa kasamtangan maoy naglingkod sa ikalima puwesto sa Western Conference. Ang Spurs mitidlom sa ika-13 nga luna dala ang 5-9 nga baraha.
Sa laing duwa, mipaulbo na usab si James Harden og 36 puntos ug laing triple-double ang nadibuhO NI Russel Westbrook sa dihang gilubong sa Houston Rockets ang Portland TrailBlazers, 132-108.
Gawas sa iyang 28 puntos, si Westbrook mipakatap usab og 13 ka rebounds ug 10 ka assists - iyang ikatulong triple-double sa karon nga season.
Sila karon ang nag-akupar sa ikaduhang dapit nga may 11-3 nga baraha, sunod sa 11-2 sa Los Angeles Lakers.
Perming naglabaw ang Rockets og double-digits sa maong kagabhion nga mao usab ang pagbalik nila ni Clint Capela ug Danuel House gikan nga nagpaalim sa ilang tagsatagsa ka mga injuries.
Si Capela mipugnit og 22 puntos ug 20 ka rebounds.
Samtang didto sa Los Angeles, mipabuto og tres si Paul George sa katapusang 25 segundos aron aswaton ang Clippers ngadto sa 90-88 nga kadaugan batok sa iyang kanhi team Oklahoma City Thunder.
Kini maoy ikawalo nga daog sa Clippers diha sa Staples Center sa siyam nila ka duwa.
Nag-ong-ong sa kapildihan ang Clippers sa dihang gitabla ni Danilo Gallinari ang score, 86-86, pinaagi sa iyang tres nga gisundan sa duha ka free throws ni Chris Paul, 88-86, pabor sa Thunder.
Ang tres ni George maoy naghatag kanila og balik sa manubela, 89-88. Human masipyat si Gallinari sa iyang tres, nakuha ni George ang bola ugdali kining gi-foul.
Bugnaw nga gipasulod ni George ang unang free throw ug tuyo nga gisipyat niini ang ikaduha nga natukma sa pagkapupos sa oras.
Sa ubang mga duwa, gipakaging sa New York Knicks ang Cleveland Cavaliers, 132-105, midaog usab ang Pacers batok sa Nets, 115-86;
Gilubong sa Toronto Raptors ang Charlotte Hornets, 132-96; samtang gilupig sa Milwaukee Bucks sa sinungayay ang Chicago Bulls, 115-101.
Mibangon og balik ang Boston Celtics ug ilang gipasawop ang Phoenix Suns, 99-85. Nayabag ang Utah Jazz sa dihang gipalanugan kini sa tingog sa Timberwolves, 102-112. (JBM)