SAKTONG kombati ang masaksihan karong gabii sa nagpadyaon nga PBA Governor’s Cup nga ipahigayon sa Ynares Sports Center sa Antipolo, Miyerkules, Nobiyembre 20.
Kini human nga ang San Miguel Beer ug ang TNT KaTropa, ang duha ka title-contender sa nagpadayon nga conference, mag-ilog sa katapusang luna alang sa Top 4 sa quarterfinals round aron pagkuha sa twice-to-beat incentives.
Ang panagsangka sugdan sa alas 7 sa gabii.
Ang mapildi ning maong panag-engkuwentro mahitabo sa laing upat ug ubos nga standing diin nagkinahanglan og duha ka daog sa quarterfinals aron makasulod sa semis.
Taliwala sa gikatahong kagubot nga mihugpa atol sa ilang praktis sa niaging adlaw, ang import nga si Dez Wells giingon nga nibalik na og praktis. Si Wells, gikataho nga sa niagi nilang praktis, nakakita og away nga naglakip usab nila ni Arwind Santos, Ronald Tubid ug Kelly Nabong.
Hangtod ning pagsulat, wala pa makadawat ang buhatan ni commissioner Willie Marcial og notice nga mag-ilis og import ang San Miguel.
“Nahilot na,” matod ni San Miguel coach Leo Austria.
Laing kulbahinam mao ang panagsangka usab sa Alaska Aces ug NLEX Road Warriors sa preliminary match sa alas 4:15 sa hapon.
Ang kadaugan sa Alaska maghatag kanila og otomatikong lingkuranan alang sa quartefinals sa ikapito o ikaunom nga puwesto, apan ang kapildihan maoy magtukmod kanila sa pagpakigsangka sa Columbian Dyip diin ilang ilogan ang ikawalo ug katapusang puwesto.
No bearing na man tuod sa NLEX ang ilang duwa batok sa Alaska tungod kay sila man ang nag-una sa standing human sa elimination round, apan importanti alang ni coach Yeng Guiao nga makabawi ang Warriors sa ilang uwahing kapildihan aron mahibalik ang kompiyansa sa team sa quarterfinals. (JBM)