SUPERBALITA CEBU

Cabahug gusto mobalik sa ABL

HUMAN makadesisyon nga mobiya sa Cebu-Casino Ethyl Alcohol, prayoridad karon ni Patrick Jan Cabahug nga mobalik og duwa sa Asian Basketball League (ABL).

Si Cabahug, usa sa mga inilang shooter, nakahukom nga dili na mopadayon pag-abag sa kampanya sa Casino sa Maharlika Pilinas Basketball League (MPBL) tungod sa iyang problema tali sa ilang bag-ong coach nga si Noynoy Falcasantos.

“Di ko niya (coach) tagaan og playing time kay di kuno siya gusto og dunay special treatment sa team. Dili kuno sama sa miaging coach. So mora og dili ko haom sa iyang sistema.Naka-decide na lang ko nga mo-stepped back,” matod sa lumad nga taga Minglanilla, Cebu kinsa kanhi usab magdudula sa University of the Visayas Baby Lancers.

Kagahapon, si Cabahug miuli sa Sugbo human kini gipatawag sa top management sa Casino-IPI.

Apan human sa meeting, matod niya, nga dili na gyud siya mobalik pa og duwa sa maong team ug anhi lang una sa Sugbo siya magpalabay sa panahon.

Sa dihang gipangutana kon andam ba siyang mobalhin ngadto sa ubang mga team sa MPBL, ingon niya nga wa siyay plano pa niini, sa pagkakaron.

“Naay mga teams ni-offer and some how ako pa ning gihunahuna if moduwa ba ko or dili, kay sa pagkatinuod lang ang heart man gud nako naa gyud sa Cebu,” matod ni Cabahug sa online interview sa Superbalita.

Iyang gibutyag nga nagpaabot siya sa liga sa gawas sa nasod. Pasabot ni Cabahug mao ang Asian Basketball League (ABL).

“Nagpaabot ko aning liga sa gawas. Karon more on plano pa ko kon asa gyud ba ug unsa gyud ang right decision nako,” dugang niya. “I think one week to decide siguro okay nana.

Dili bag-o ni Cabahug ang pagduwa sa ABL sanglit niadtong 2014 nagsugod siya og duwa sa Thailand Vampire squad uban sa laing Sugbuanon nga si Jeric Canada, lumad usab nga taga Minglanilla. Sila usab ang na-champion niadtong higayona.

Katapusan niyang team sa ABL ang Westpoint Malaysia Dragons sa Kuala Lumpur sa wala pa siya mouli sa Pilipinas ug moduwa alang sa Casino Ethyl Alcohol nga niadtong higayona ubos pa sa pagdumala ni coach Norberto “Titing” Manalili.

Sa pagkakaron, sa Sugbo lang una niya igahin ang iyang panahon uban sa iyang pamilya. Si Cabahug nakaduwa sa UV Baby Lancers sa 1999-2001 ug nalakip siya sa team nga nakalangkat og back-to-back title. Siya ang MVP sa 1999 season sa Cebu Amateur Athletic Association (CAAA) nga karon mao na ang Cebu School Athletic Foundation, Inc. (Cesafi).

Samtang ania sa Sugbo, gusto usab ni Cabahug nga motan-aw ug mosuporta sa UV sa Game Two sa Cesafi finals batok sa SWU-Phinma Cobras, Huwebes, Nobiyembre 21 sa Cebu Coliseum.

Ang Cobras maoy midaog sa Game One aron sakmiton ang bintaha sa best-of-three series, 1-0.

Nagtuo si Cabahug nga makabawi ra gihapon ang Lancers sa Game Two.

“Stay positive lang aron maka-bounce back sila sa Game 2 ug composure sa game bisag labaw ang SWU sa series,” mensahe ni Cabahug. (JBM)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph