SA MAKAUSA pa, ang Philippine Azkals nasugamak na usab og kapildihan sa mga kamot sa Syria, 0-1, sa second round sa 2022 FIFA World Cup ug 2023 Asian Cup Qualifiers sa Dubai niadtong Martes, Nobiyembre 19.
Bisan pa man tuod og mas maayo ang ilang gipakita ning higayona, apan ang Azkals napakyas sa pagpugnit og puntos batok sa World No. 82 nga Syria.
Sa ika-23 minutos sa duwa, si Neil Etheridge wa makapakgang sa goal ni Al Salama.
Gikan niadto daghan untang mga oportunidad nga makatabla ang Pilipinas apan ang kahugot sa depensa sa ilang kontra maoy naghatag og kadaugan sa Syria.
Ang Azkals nagpabilin nga anaa sa ikatulong dapit sa Group A nga may siete puntos samtang ang Syria mipalig-on sa ilang paghupot sa liderato nga may 15 puntos.
Ang Pilipinas moduwa sa sunod Qualifiers sa Marso 26, 2020 batok sa Guam, ang team nga ilang gipukan, 4-1, sa niagi nilang panagsangka. (JBM)