NUNOT niining pag-abot sa 21 ka mga bag-ong garbage compactor trucks, epektibo na unya ang paghakot sa atong mga basura dinhi sa dakbayan sa Sugbo. Ang kagamhanan sa dakbayan sa panahon ni kanhi mayor Tomas Osmena mipalit sa maong mga brand new units aron maoy gamiton sa paghakot sa mga basura gikan sa mga kabarangayan pa-ingon sa transfer station sa Inayawan og dayon na sa sanitary landfill sa Consolacion o ba kaha sa Binaliw.
Ang maong mga brand new units pun-an pa sa 12 ka mga karaang units, igo na nga moserbisyo sa paghakot sa volume sa mga basura sa dakbayan. Gumikan niini, sa sunod tuig putlon na sa dakbayan ang pag-privatize o pag-outsource sa paghakot sa mga basura. Tapuson na lang ang kontrata tali sa kagamhanan sa dakbayan ug sa Jomara Konstruct karong Disyembre. Ang kagamhanan nagbayad sa Jomara og P25 milyones nga kontrata gikan sa Hulyo hangtod sa Disyembre.
Human unya niini, ang kagamhanan na ang mangunay sa paghakot sa mga basura. Matod pa ni Mayor Edgardo Labella makadaginot ang City Government og P50 million matag tuig kon ang City Hall mismo ang mangunay sa paghakot sa mga basura og dili ipaagi sa private contractor. Sa nangaging administrasyon, gipaagi sa private contractor ang paghakot sa mga basura diin daghan ang nakakuwarta pinaagi sa komisyon o ba kaha patong o overprice.
Sa panahon ni Osmena ang iyang paboritong supplier og contractor, Pasajero Motors Corp. (Pamocor) nga gipanag-iya ni Franklin Ong, ang kanunay nga makadaog sa bidding sa paghakot og basura. Daghang nakasapi kay adunay kuwarta diha sa basura. Miburot og maayo ang budget sa garbage collection sa panahon ni Tomas.
Sila nagbuot-buot sa presyo sa paghakot sa basura. Ang ordinaryong mga tawo walay kalibutan o dili na maghikutar kon pila matag ton. Ang importante nga limpyo ang atong kadalanan ug walay basura nga makita. Karon kay putlon naman ni Labella ang maong pamaagi, daghang magrigor sa taga City Hall kay dili na sila makasapi.