NAHIMONG sentro atol sa ika-52nd Founding Anniversary sa Philippine Coastguard (PCG) Central Visayas ang paghatag og pasidungog sa bayanihong nahimo ni Petty Officer 2nd class Ralph Barajan.
Si Barajan ang mitabang aron maluwas ang mga pasahero sa nalunod nga M/V Siargao Princess niadtong Nobyembre 7 samtang naglawig gikan sa Loon, Bohol paingon unta sa Sibonga, habagatang Sugbo. Sakay siya sa maong barko ug naka-off duty niadtong higayona.
Matod sa mga pasahero nga dakong tabang ang gihimo ni Barajan, hinungdan nga tanang 63 nga sakay sa fast-craft luwas.
Atol sa pagsaulog nga gihimo Myerkules sa hapon, Nobyembre 20, opisyal na sab nga gi-promote si Barajan, gikan sa Petty Officer 3rd class ngadto na sa Petty Officer 2nd class ug gihatagan usab og ikaduha sa pinakataas nga heroism award ang Medal of Distinguished Conduct.
Samtang giasabot ni PCG-7 commander, Commodore Ronnie Gil Gavan, nga gipaningkamutan pa sa ilang legal department ang nga rekisitos aron mahatag ang medal of valor ngadto kang Barajan.
Gawas niini, gipahibalo sa ilang pinasidunggang dinapit nga si Commodore William Isaga ang chief sa Coast Guard staff nga usa sa madawat ni Barajan mao ang mamahimo na siya nga mo-apply alang sa pagka-opisyal sa coastguard diin magsugod sa ranggo nga Ensign.
Matud ni Isaga nga dili na kinahanglan pa mo-take og exam si Barajan, gikinahanglan lang nga iyang eskwelahan ang usa ka tuig nga training course kay kwalipikado na usab siya isip usa ka Baccalaureate graduate, kay registered nurse ang maong opisyal.
“Really hero is not just six feet tall, masculine. Hero pala is ordinary people doing extraordinary job in an extraordinary situation, and I think that definition fits the newly promoted PO 2nd Barajan. Kanina tumulo luha ko I am so happy na, of all the people inside the unfortunate ship is a coastguard. It made me so proud to be a Coastguard,” tipik sa pamahayag ni Isaga.
Gitug-an usab ni Gavan nga na-sentro sa heroic nga nabuhat ni Barajan ang ilang anniversary, gi-isip kini nga simbolo sa usa ka coastguard.
“We are basically lifesavers, expected to go the harms way. He live that kind of life, we would like to inspire other coastguard that a coastguard is more than a profession it is a vocation that requires a selfless service to others and even in other government agencies,” pamulong ni Gavan.
Sa iyang bahin, gitug-an ni Barajan nga way kabutangan nga kalipay nga nahimo siyang inspirasyon sa iyang kaubanan.
Daku usab ang iyang pasalamat sa nagpadayon nga nadawat nga pasidungog.
Uban kaniya nga nidawat sa pasidungog ang iyang asawa, anak ug ginikanan. (FMD)