NIADTONG Hulyo 2019, tulo ka mga tawo ang nangamatay sa dihang nabanggaan ang duha ka mga sakyanan sa usa ka sports utility vehicle (SUV). Sa imbestigasyon sa Mabolo Police Station, nakainom sa ilimnong makahubog ang 21 anyos nga drayber sa SUV.
Duha ka mga pasahero sa multicab ug drayber niini nangamatay tungod sa grabeng kadaut sa lawas bunga sa kakusog sa impact. Nabungkag ang pasaheroang sakyanan sa impact.
Niadtong Martes sa kaadlawon, Nobiyembre 19, usa ang namatay diha-diha samtang unom ang nangaangol human mabangga sa kahoy ang usa ka multicab nga gisakyan sa mga call center workers sa kahoy. Nitumaw sa imbestigasyon nga puro nga nakainom ang mga sakay, apil na ang drayber.
Pipila lang kini sa mga aksidente sa karsada nga nikutlo og mga kinabuhi tungod kay ang drayber hubog samtang nagmaneho. Daghan pang mga aksidente nga bunga sa kahubog sa drayber.
Niadtong 2018, gikan sa Enero 1 ngadto sa Hunyo 30, ang statistics sa Land Transportation Office (LTO) nagpakita nga dunay 100 nga nadakpan sa paglapas sa Republic Act 10586, kun pagmaneho nga ubos sa impluwensya sa alcohol o illegal nga drugas. Kana nga figure alang lang sa mga nasikop sa unang higayon.
Unsay gipakita niini? Ang mga awtoridad nga gitahasan sa pagpatuman sa mao nga balaud, sama sa LTO ug Philippine National Police (PNP) wa magbuhat sa ilang mga tahas.
Kon naghimo pa sila sa ilang gimbuhaton, hayan ang mga aksidente tungod sa drunk driving di mahitabo. Pila ra man unta ang pagpalit og breath analyzer ug pagbutang og checkpoint aron pagsukod sa alcohol nga nainom sa drayber.
Di ni lisod buhaton kay mahimo ra kining anha ipahigayon sa mga dapit nga naay daghang imnanan.
Kanus-a pa kaha mahuwasan sa ilang kahubog ang mga tigpatuman sa balaud?