ORMOC City, Leyte -- Padayun nga gipangita sa kapulisan sa Ormoc City ang usa ka babaye ug kaubanan niini nga tungod sa pagpalit og mga sakyanan gamit ang tseke nga walay sud o niuntol.
Base sa report sa Ormoc City Police Station 3, duha ka luxury pick up trucks ang nadagit sa duha, usa ka Toyota Hilux ug usa ka Nissan Navarra.
Ang Hilux dunay plate number AQA 6110 ug ang Navarra dunay plate number FZR 822.
Nadagit usab ang laing duha ka multicab nga dunay plate number MAJ 2071 ug temporary plate number 1230114676.
Base sa police report, ang mga sakyanan nakit-an sa Surigao niadtong November 10, pasado alas 4 sa kadlawon.
Dugang sa report, ang multicab nga may plakang MAJ 2071 katapusan nakit-an nga nagbiyahe sa Agusan Del Norte niadtong November 10, 2019, pasado alas 12 sa udto.
Gawas niini, nakadagit usab og mga sinako nga bugas gikan sa nagkadaiyang supplier ang suspek.
Nakabutang sa police report nga ang suspek ginganlan og Milagros Garcia Roa.
Apan matod ni Police Captain Bryan Vicedo, hepe sa Police Station 3, dili lang kay si Roa ang ilang gipangita lakip na ang kauban niini nga si Michael Nabre ug laing tulo.
Usa sa tag-iya sa sakyanan nga nadagit nga si Arnold Rebato niadto sa bangko aron pasuklian unta ang cheke apan iyang nahibaw-an nga wa kini sud.
Dugang ni Vicedo nga planado kaayo ang krimen kay pipila sa mga nailad nakakompirmar nga dunay sud ang account nga gihatag apan sa dihang pasuklian na unta ang post dated nga tseke, niuntol kay wala nay sud ang account.
Gidala pagkontak sa mga biktima ang mga suspek apan di na kini makontak ug wa na silay nadawat nga reply.
Gisaysay sa biktima nga niingon kaniya ang taga bangko nga siya ang ika unom nga niadto nga niuntol usab ang tseke.
Usa ka kasaligan nga tinubdan sa Krusada Balita ang niingon nga maayo kaayo manulti ang suspek ug katuohan kaayo ang pamorma hilabi na kay maydala pa nga sakyanan.
Dugang ni Vicedo nga duna na silay lead karon sa mga suspek human ilang naimbistigar ang drayber sa wing van nga giabangan sa mga suspek pagkarga sa mga bugas padung Mindanao gikan Ormoc.
Ang Ormoc City Police Office miawhag sa dunay kasayoran bahin sa suspek palihog sa pag contact sa Ormoc City Police Station 3 o tawag o text sa mga numero: 09989674958, 09985986695/ ug 9985986697. (JKP)