SIKOP ang duha ka mga lalaki pinaagi sa buy-bust operation sa mga otoridad niadtong Nobyimbre 20 sa hapon sa Mastersons Avenue, Upper Carmen ning siyudad sa Cagayan de Oro.
Giila sa kapulisan ang mga suspetsado nga sila si Kier John Lucero, 26, taga Lapasan ug ang giingong drayber nga si Leonil Yabut, 23, ulitawo ug usa ka habal-habal drayber.
Sa pakighinabi ngadto na kay PSSG Steven Jan Tamayo sa Police Station 8 (PS8) sa Lumbia nakuhaan og pito ka pakete sa gitoohang shabu ang maong mga dinakpan ug giingong mga gun for hire kini gani kauban usab ni Alyas Bingkol kinsa iladong gapanulis sa siyudad kaniadto.
"Isa man gyud siya nga niingon nga kauban ni Bingkol, ug atong balikan ang nahitabo sa Cagayan de Oro daghan-daghan na gyud," matud ni Tamayo.
Gidugang usab niini nga dili kini motoo nga nag-abang lang og armas ilabi na nga pagpatay ang trabaho niini.
"Sa akoa dili convincing nga gaabang lang sila og armas kay kini sila mao naman ilang trabaho so naa gyud ni silay armas," dugang ni Tamayo.
Nasayran nga nagpatoo ang kapulisan ug nakigsabot ngadto sa mga suspek nga ilang ipapatay ang giingong lalaki sa ilang asawa ug gani P5,000 ang gipangayo ni Lucero.
Samtang niangkon si Lucero nga gagamit kini og druga ug duna unta silay patyon.
"Wala pa gyud, karon unta, wala ko kita sa laki, .38 among gamiton sa mga amigo ra, mga tambay ra gihapon gikan sa Iligan, diha sa Lapasan," matud ni Lucero.
Giingong singko mil (P5,000) ang pangayo niini ug i-abang pa ang dos mil (P2,000) og armas diin molimpyo og anaa sa P3,000.
Gihimakak usab ni Yabut nga duna kini kalambigitan niini apan giangkon nga gagamit og druga.
"Wala man koy labot ani, igo raman ko niya gipukaw kay magpahatod," saysay ni Yabut.
Ang mga suspek ang anaa na sa buhatan sa kapulisan ilabi na sa PS8 sa Lumbia.