ORMOC City, Leyte -- Gatusan ka sakong mga hinabang ang nati1gom sa LIGA ng mga batangay sa Ormoc City alang sa mga biktima sa linog sa Mindanao.
Matod ni Emma Fragata sa LIGA, naa na sa kapin kun kulang usa ka gatos ka sakong bugas ang ilang natigom.
Duna usab mga kinarton nga mga delata sama sa sardinas, corned beef, beef loaf ug duna usab nga kinarton nga bottled water, kape ug noodles.
Nakatigom usab og mga sinako nga mga sinina ang LIGA.
Nasayran nga sa miaging semana, atol sa ilang board meeting, nadesisyonan sa mga opisyal sa LIGA nga manuktok sa kabalayan sa matag barangay ug mangolekta sa hinabang.
“Nindot paminawon nga dunay mga residente nga bisan tagsa ka kilo or duha ka kilong bugas ilang gihatag kay atleast matigom ra gihapon,” matod ni Fragata.
Usa sa nakaaghat sa LIGA tungod kay mao usab kini nga higayon nga mopadangat ang dakbayan og tabang niadtong mga lugar nga nakatabang usab panahon nga naigo ang Ormoc og bagyo ug linog.
“Mura ba gud ni og payback time ba nga niadtong panahon nga naigo ta og kalamidad gitabangan ta. So, karon panahon sab nga kita ang mo tabang,” matod ni Fragata.
Kutob nalang sa Huwebes, petsa 21 ning buwana mo dawat sa mga hinabang ang LIGA kay sa Biyernes ila na kini ipadala sa Makilala Cotabato.
Napili ang Makilala gumikan kay sa maong lugar grabe ang kadaot nga nahiagoman ug daghang pamilya ang apektado.
Gawas niini, si Ormoc City Mayor Richard Gomez nihatag usab og P5,000,000 nga tabang pinansyal sa lima ka lungsod nga naigo sa linog.
Nipadala usab og 14 ka tawo ug mga ekipo gikan sa City Disaster Risk Reduction and Management (CDRRMPO) ang Mayor.
Ang mga opisyal sa Cotabato hilabihan ang pasalamat sa maong tabang.
Subli nga mipahibawo si Mayor Gomez nga andam ang dakbayan moresponde sa mga nanginahanglan sud ug gawas sa Ormoc.