TULO ka mga dumptruck sa relief goods ang gihatod sa kagamhanan sa Misamis Oriental ngadto sa mga biktima sa linog sa Digos City ug Magsaysay, Davao del Sur.
Sayo sa kaadlawon gibiyahe sa Provincial Risk Reduction Management Office (PDRRMO) gipangunahan ni Jeric Abasa samtang nag-una na sa dapit ang team sa Provincial General Services Office sa pagpangulo ni Matt Valleser, MisOr Veterinary Office Head Dr. Benjie Resma; Provincial Cooperative Head Buboy Acain ug Clint Jude Puertas.
Sulod sa dumptruck mao ang mokabat sa 100 ka sako sa bugas nga mobalor og P125,000.00. Mokabat sab dayon sa 1,000 ka mga water container nga dunay faucet mobalot og P146,000.
Aduna sab 200 ka mga makeshift tent nga mokantidad og P323,300.00
Nagkadaiyang medisina nga mokantidad og P1,350,155.44.
Mokabat sab sa 200 ka mga food packs nga mobalor og P32,000.00 ug laing 100 ka sako sa used clothing nga mokantidad og P50,000.00.
Sa kinatibuk-an moabot ngadto sa P2 milyon kapin ang nahatag nga relief goods.
Gihinaot ni Misamis Oriental Governor Bambi Emano nga kining ilang gipadala nga ayuda makatabang alang sa ilang pagbangon, ug naga-ampo nga magmalig-on sila alang sa ilang pagpadayon sa panginabuhi ug pagpakabuhi ibabaw ning kalibotan.
Gikalipay sab kini ni Davao del Sur Governor Douglas Cagas hilabina nga daghan sa ilang mga residente ang apektado labina gyod ang lungsod sa Magsaysay ug uban pa nga mga barangay nga wala na nanguli sa ilang gipuy-an ug anaa na sa mga tent ug kalubihan nagpasilong.
"Salamat kaayo kay gikinahanglan gyod kaayo na namo nga tabang," matud ni Douglas ug miingon nga ang linog wala nila gidahom nga kalamidad ug gani aduna silay mga evacuation center sama sa gymnasium nga pwedeng mapuy-an apan tungod kay linog man ang nihapak kanila ang katawhan ang magpuyo sa dapit nga layo sa mga estruktura ug nangusog nga dili na mamalik sa ilang puloy-anan.
Adunay plano nga relokasyon alang sa mga biktima apan usa sa hagit kay dili mobiya ang mga biktima sa ilang gipuy-an.