TUNGOD sa nagkataas nga ihap sa mga nigamit og e-cigarettes kon vape gilakip na kini sa ordinansa sa siyudad sa Cagayan de Oro.
Gibutyag ni Konsehal Maria Lourdes Gaane, tsirman sa komitiba sa health o panglawas sa siyudad nga ila na ilakip nga sikupon susama sa pag-regulate sa mga nigamit og sigarilyo.
"Ang electronic vape gi-include namo na karon sa local ordinance sa task force, kay naa may task force sa smoke free CdeO, naa na siya pending pa na siya kay naa naman tay existing nga EO 26 pero wala ma included ang e-vape included na siya karon sa local ordinance," matud ni Gaane.
Gidugang pa niini nga dili mapahunong kining e-vape kay lage naa na kini sa komunidad karong panahona.
"Actually dili man nato macontrol kay naa na gyud na ang electronic vape but we can regulate that, kay didto sa atong local ordinance naka state didto ang atong guidelines," dugang pa.
Gidugang usab niini nga susama kini sa implementing rules and regulation (IRR) sa mga sigarilyo nga dili pwedi sa gawas ug diha lang sa sulod nga dapit.
"Dapat ang ilang area nakabutang the same IRR nga dili gyud pwedi sa gawas naa ra gyud sa enclose ang e-vaping," dugang pa.
Nasayran nga nag -benchmark kini sa siyudad sa Davao aron nga hingpit nga mapatuman susama sa maong siyudad.
Aminado usab kini nga galisod pa sa pagpatuman tungod na usab sa kakulangon sa manpower.
Nasayran nga sa United States anaa sa 2,051 nga kaso sa lung injuries kalabot na sa vaping ug anaa na sa 39 ang natalang namatay tungod niini.
Anaa usab sa 54 porsyento ang nag-edad og 24 paubos nga mga users o nigamit og e-cigarettes.