SUPERBALITA CEBU

Nakita sa CCTV, pulis giunhan?

ANG kapulisan sa Lapu-Lapu City nakakuha og kopya sa CCTV sa nahitabong kagubot tali sa mga sakop sa Police Station 3 sa LCPO ug duha ka mga sakop sa Alpha Kappa Rho Akrho fraternity gawas sa Lapu-Lapu City Auditorium niadtong Dominggo sa kaadlawon Nobiyembre 17.

Nakita ang giingong pagpanghapak gamit ang karton sa mineral water sa usa ka sakop sa Akrho ngadto sa usa ka pulis sa Police Station 3 nga si Police Staff Sergeant Adrian Yonting.

Si Yonting giingong misita lang unta sa mga sakop sa Akhro nga matod pa mikantiyaw sa ilang gipahigayong dakop sa usa ka nangulata ug multicab driver.

Ang naasoyng insidente maoy nakapa-aghat sa mga kauban ni Yonting sa paghamag ug pagdapat sa nanghapak nga sakop sa Akrho nga nailhang si Paul Jay Pogoy.

Matod ni Police Colonel Clarito Baja ang director sa Lapu-Lapu City Police Office LCPO nga ang video karon ilang nahuptan dako ug matabang sa nagpadayon karong imbestigasyon kalabot sa naasoyng insidente.

Gipasabot ni Baja nga nagpakita lang kini nga aduna usay basehanan ang pangangkon sa mga pulis sa Police Station 3 nga gi-unhan ang usa sa ilang kauban ug hapak hinungdan nga sila mi-react ra usab ug midapat kang Pogoy.

Dili hinuon makabutyag si Baja nga wala nay sala o nalapas ang mga sakop sa Police Station 3 sa naasoyng hitabo sanglit nagpadayon pa ang ilang imbestigasyon.

Ubos sa gipahigayong imbestigasyon gikatakdang ipatawag ang mga pulis nga nakita sa video nga nanapat ug ang mga sakop sa Akrho nga gipasanginlang mihapak ug mi-interbener sa usa ka police operation.

Gikatakda usab nga mangita ug mga witnesses ang investigating body sa dapit nahitabo-an aron maklaro gayud ang hitabo.

“Katong premiro man gud nga gikatap (video) kay mura man gud ug diritso ra way sulti unsay hinungdan ngano na in-ato pero karon at least naa diay, nagpasalamat pud ko sa nag-video o nag-upload ana nga siguro concern ra pud siya siguro sa kapulisan nga iya gyud gipakita ang sinugdanan nganong niabot adto,” matod ni Baja.

Samtang gipadayag ni Baja nga bukas ra usab siya ug walay nakitang problema sa laing kaugalingong imbestigasyon nga gilusad ni Lapu-Lapu City Mayor Junard “Ahong” Chan kalabot sa hitabo sanglit pagpakita lang kini nga wala silay gitago-an ug andam mopa-ubos sa bisag unsang imbestigasyon.

Sa pangutana kon andam ba ang kapulisan sa pagpinasayloay sama sa hangyo ni Chan aron dili na modako pa ang hitabo ug wala nay mahitabong pag-file sa mga kaso gipadayag ni Baja nga dili gayud kini nila mahimo.

Pagpasabot ni Baja ang video sa hitabo nag-viral na sa social media ug posibleng naka-abot na sa kadagkuan sa kapulisan sa Camp Crame hinungdan nga sila usab ang makwestiyon kung dili nila ikiha ang mga sakop sa Akrho nga misuway ug interbener sa ilang police operation niadtong tungora base sa baroganan sa mga sakop sa Police Station 3.

“Lisod in the part of PNP gud kay kung e-settle na-aresto man sila ug diha man say insidente ug na-file na namo ang kaso” matid ni Baja.

Ang pulis nga si Yonting ug mga kaubanan niining nakita ug apil sa video nga nanapat ug Akrho nga sila si Chief Master Sergeant Rodrigo Inoc, P/Ssgt Lexter Alvario ug P/Cpl John Paul Sojor pulos na girelibuhan sa pwesto.

Samtang ang mga sakop sa Akhro nga sila si Pogoy ug Danilo Taghoy pulos na usab napasakaan ug kasong Direct Assault, Obstruction of apprehension, Disobedience ug Resisting Arrest ug Drunkenness. (GCM)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph