MAKIGTAGBO pag-usab si Gobernador Gwendolyn Garcia sa mga bus liners alang sa planong pagpatuman sa online ticketing aron nga mahimong mas sayon alang sa mga pasahero nga makakuha og ticket ug dili na kinahanglan nga mulinya pa, nga usa sa hinungdan sa kahuot sa sitwasyon sulod sa Cebu South Bus Terminal (CSBT).
Matod ni Garcia nga pinaagi niini, isyuhan nalang og entry pass ang mga pasahero kon nakapalit na kini og ticket online ug modiretso nalang sa waiting area aron mas maminusan ang taas nga linya.
Matod niya nga unahon una pagpanday ang ticketing center aron mas hapsay na kon ipatuman ang online ticketing.
“I think if mabutang nato ang online mas dali na, kana gyud that’s why I asked nga ma cleared na di man to kinahanghlan ang laboratory koop, mas dapat ato nang igahin sa atong mga bus lines aron mas sayon sa atong mga pasahero pagpalit sa ilang tickets,” matod ni Garcia kagahapon, Nobiyembre 20, 2019.
Samtang giklaro sa gobernador nga dili na mausab pa ang iyang desisyon nga ipadayon ang “No ticket, No Entry” nga sistema, bisan pa man sa mga saway nga iyang nadawat.
“I am defining my priority, safety and security of our passengers even if they will be angry at me because na-distorbo ang ilang sayon apan peligroso nga naandan nga paagi”, matod ni Garcia.
Hinungdan nga sa bag-ong pamaagi, pinaagi sa paghatag ug entry pass sa mga pasahero mas pahugtan usab sa CSBT ang seguridad niini aron wala’y makalusot nga mga mangunguot o kadtong manglawgaw lang sa kahusay sa maong terminal. (ANV)