MAGMATNGON na kadtong tiggamitan og vape o E-cigarette sa dihang ang Police Regional Office 7 niluwat og kamanduan nga dakpon ang mopabulhot niini ngadto sa publikong dapit ingon man ang pagsakmit sa maong matang sa sigarilyo.
Ang kamanduan gipakatap sa tanang police commanders sa rehiyon.
Samtang si P/Col. Roderick Mariano, hepe sa Cebu Provincial Police Office, mipagawas sab og kamandoan sa tanang chief of police sa kalungsuran nga ipatuman ang Executive Order 26 ni President Rodrigo Duterte.
Apan dili mahimong mosikop sa naggamit niini samtang walay tinong balaud nga basehanan sa pagdakop.
Kini gumikan kay wala pay implementing rule and regulation (IRR) gawas ang pagbadlong una ug pagsakmit sa E-cigarettes.
Ang tuyo sa kamanduan aron paghatag og proteksiyon sa mga tawo nga malikay sa sakit nga dala sa E-cigaretes.
Makig-alayon usab sila sa mga tindahan nga namaligya og e-cigaretes aron mapahimangnu-an ang mga namaligya niini.
Si P/Maj. Gerard Ace Pelare hepe Talisay City Police Station sa iyang bahin mipahibawo sa ilang strikto nga ipatuman ang kamanduan ni Presidenti Rodrigo Duterte.
“The directive, once we receive the memo, is for their own good and the public, so they better adhere to the new directive of the President because will implement it strictly,” pasabot ni Pelare.
Sa laing bahin, suportado sa regional director sa Department of Health (DOH) 7 Dr. Jaime Bernada ang lakang I-ban ang vape ug e-cigarette sa publiko nga gisegundahan sa Department of Education.
“The DOH’s initial step to require Certificate of Product Registration (CPR) and LTOs of these vapes through the Food and Drug Administration earlier was stopped by the court in a TRO,” pamahayag ni Bernada.
Ang labing una nga kaso sa e-cigarette and vape lung injury (Evali) nga kaso sa nasod naggikan sa Sugbo ug 16-anyos kini nga babaye.
Mga nanag-iya og vape shops nabalaka sa epekto unya sa ilang negosyo kalabot sa maong kalambuan.
Ang manager sa maong shop nga usa sab ka vape user nagkanayon nga dako og natabang niadtong kanhi manabako nga mi-undang na sa maong bisyo ug migamit nalang og vape.
Matod pa nga taodtaod na siyang nag-vaping gani sa iyang labing uwahing medical check-up way nakitang kadaot diha sa iyang baga.
Dugang pa niya nga tanang vape shops midili sa pagpasud o mobaligya ngadto sa mga minor de edad. (AYB, FMD, HBL, JOB)