GITUKOD ni Cebu City Mayor Edgardo ang Task Force Patubig para sa urban barangays nga grabeng naapektohan sa kakuwang sa tubig gikan sa Metro Cebu Water District (MCWD).
Si Labella nipadagan sa upat ka mga water tanker sa City Government, tag-usa gikan sa barangay Sambag II ug Sta. Cruz ug laing mga tanker sa MCWD para maoy mohatag og tubig sa 12 ka mga barangay sa siyudad.
Ang mayor nagkanayon nga makig-alayon usab siya sa barangay Sto. Niño sanglit adunay dagko nga water tanker ug nipasalig usab ang Mactan Rock nga mohatod og tubig mainom gamit ang ilang kaugalinong nga suplay sa tubig gamit sa ilang tanker.
Si Atty. Jerone Castillo, acting City Treasurer, maoy iyang gitahasan sa pagmonitor para ang barangay T. Padilla, Day-as, Lorega San Miguel, Camputhaw, Capitol Site, Sambag-I, Sambag-II, Carreta, Tejero, Luz, Zapatera ug Sta. Cruz sa north district mahatagan og tubig lakip na ang barangay Guadalupe proper ug Banawa kinsa maoy grabeng naapektohan.
Ang Task Force Patubig gilangkuban sa Quick Response Team sa Cebu City Disaster Risk Reduction and Management Office, General Services Office, Department of Public Services ug mga barangay fire volunteers.
Si Labella nagkanayon magpadayon ang paghatag og tubig sa maong mga barangay hangtod nga wala pay long term solution nga makab-ot ang dakbayan.
“This is a form of emergency measure while we are still awaiting for the final outcome on how we could really give and provide a steady supply of potable water to our constituents in view of the MCWD crisis situation,” paghulagway ni Labella. (PAC)