Maestro miabuso og tinun-an sa Naga gidakop

USA ka maestro sa usa ka high school sa siyudad sa Naga ang gisikop sa kapulisan human malutsi og warrant of arrest sa mga kasong acts of lasciviousness ug sexual harassment.

Ang dinakpan 34 anyos ug taga Barangay East Poblacion, Naga.

Ang warrant of arrest giluwatan ni Judge Dennis Larrobis sa Regional Trial Court Branch 76 sa siyudad sa Naga nga nagpetsa og Nobiyembre 8, 2019.

Matod ni P/Maj. Leo Ty, hepe sa Naga Police Station, nga gireklamo ang magtutudlo sa miaging tuig sa iyang lalakeng tinun-an sa high school.

Giingong gihilabtan niya ang tinun-an nga maoy hinungdan nga gipasakaan siya og kaso niini.

Human mogawas ang iyang warrant of arrest ila dayon gilusad ang manhunt operation ug didto ilang naabtan sa sulod sa iyang classroom sa Barangay Langtad ang magtutudlo.

“Wala na mi kaayo makahibawo sa nahitabo ani niya basta gi filan siyag kaso sa iyang estudyante last year kining acts of lasciviousness ug sexual harassment,” matod ni Ty.

Gihimakak sa magtutudlo ang pasangil batok kaniya, apan ang piskaliya nakakita og igong hinungdan nga pasakaan siya og kaso sa korte. (AYB)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph