Shabu sa merkado

SHABU gibaligya sud sa merkado sa Barangay Tabunok, dakbayan sa Talisay nabutyag samtang, kapin sa P10 milyunes nga gidiling drugas ang nasakmit sa managlahing drug busts.

Usa ka nagpakabana nga Talisaynon ang nipindot sa kapulisan kalabot sa ilegal nga kalihukan sa mga batan-on sa eskina dapit sa merkado sa Tabunok.

Ug niadtong Martes sa pasado alas 3:00 sa hapon, Nobiyembre 19, nilusad og operasyon ang kapulisan ug ilang naaktohan ang grupo sa mga batan-on ug nagkatibuwaag og dagan human nakamatikod sa kapulisan.

Apan si Anthony Bacarisas, 18, taga Sitio Molave sa Tabunok, nakuptan sa pulis.

Sa ilang imbestigasyon, gikompirma sa batan-on ang taho ug kalihokan sa drugas sulod sa merkado.

Tungod niini, si P/Maj. Gerald Ace Pelare, hepe sa Talisay City Police Station, nipakatap og mga tigpaniid sa dapit ug pagpahigayon og roving kanunay sa mga pulis sa dapit.

Nakuha gikan kang Bacarisas ang pito ka gagmay nga pakite sa gidudahan nga shabu.

P7.5M Shabu

Dul-an sa P10 milyunes ang nasakmit nga shabu sa mga operatiba sa managlahi nga ronda sa dakbayan ug lalawigan sa Sugbo.

Unang nadakpan si Ronjol Diaz, 20, dunay kapuyo ug molupyo sa Sityo San Roque, Barangay Calamba, siyudad sa Sugbo.

Si P/Lt. Col.Frankie Jingle Lugo, hepe sa City Drug Enforcement Unit sa Cebu City Police Office (CCPO), niingon nga ang iyang mga sakop maoy nironda kang Diaz nga nakuhaan si Diaz og usa ka kilo kapin nga shabu, diin mobalor og P 7.5 milyunes.

Si Diaz, kanhi habalhabal drayber, niingon nga wala nay trabaho nga isuporta sa ilang adlaw-adlaw nga konsumo hinungdan nga nadani sa tawag sa usa higala nga usa ka piniriso bugti sa P3,000 nga suhol, apan ang maong priso wala niya nganli.

‘Gitawagan raman ko sir nga dunay magbilin unya kuhaon ra. Ang suhol daw sa akoa pag makuha na,” matud ni Diaz.

Nakurat na lang ang dinakpan dihang mga pulis na ang nag uniporme maoy nituktok sa ilang balay ug wala na makatingog human nga makita ang shabu.

Si Diaz wala magdahom nga sa iyang pagsige og sunod sa Facebook Live sa Superbalita Cebu labi na sa mga dakop sa drugas, siya na karon ang gi- live og interview.

P2.4M Shabu

Kagahapon pasado alas 4:00 sa kaadlawon. Miyerkules, Nobiyembre 20, ang mga sakop sa Drug Enforcement Unit sa Presinto-11, Mambaling Police Station, gipangulohan sa ilang hepe PCapt. Francis Renz Talosig nihimo og operasyon hinungdan sa pagkasikop ni Elmer Apor, 26, kanhi welder ug taga lungsod sa Aurora, Zamboanga del Sur apan namuyo na sa dapit.

Si Apor nakuhaan og gibanabana nga 300 gramos nga shabu diin moabot og P2.4 milyunes.

P6M Shabu

Samtang niadtong Martes sa kaadlawon, Nobiyembre 19, moabot sa kapin P6 milyunes ang nasakmit nga shabu sa Abellana Police Station sa upat ka follow-up operations nga ilang gipatuman sa ilang hurisdeksiyon sa siyudad sa Sugbo.

P204K Shabu

Usa ka inahan nasikop ug nakuhan og druga sa buy bust sa kapulisan sa miaging gabii, Marte, Nobiyembre 19, sa Brgy. Poblacion, dakbayan sa Toledo.

Si Maria Divina Gonzaga, 43, minyo nalakip sa listahan sa kapulisan nakuhaag 11 ka putos, 1 ka medium nga putos, motimbang sa kapin sa 6 gramos nga mobalor P42 mil ka pesos.

Samtang, nasikop sab sa kapulisan Toledo ang tulo ka drug pushers sa miaging gabii sa Barangay Sangi, Toledo nga sila si Winefredo Cabonita, 42 ulitawo, taga DAS, Toledo, Jerome Salvatona, 25, ulitawo, taga Poblacion, Toledo ug Rafael Medalle, Jr., 47, ulitawo taga Poblacion, Toledo.

Ang shabu nakuha mobalor og P204 mil base sa Dangerous Drugs Board (DDB) value. (FMD, BBT, GPL)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph