ANG kanhi hepe sa Provincial Intelligence Branch (PIB) sa Cebu Police Provincial Office (CPPO) gipusil patay samtang galakaw sa dan Molave, Barangay Kamputhaw, dakbayan sa Sugbo, pasado alas 5:00 sa hapon sa Huwebes, Nobiyembre 21, 2019.
Daling gidala sa kapulisan si P/Lt. Col. Joie Yape sa labing duol nga pribadong ospital apan patay na kini pag-abot. Si P/Maj. Elizandro Quijano, hepe sa Police Station 2 sa Cebu City Police Office (CCPO), niingon nga nadawat nila ang alarma alas 5:35 sa hapon. Nasayran nila nga si Yape gikan nitambong og function sa usa ka hotel sa dapit.
Kuyog iyang asawa, naglakaw sila paingon sa Escario Street gikan sa Molave Street. Sigun sa mga nakakita, ang killer nga nagsakay sa motorsiklo diha sa luyo nila ni Yape, matod ni Quijano.
Posible nga gisundan si Yape kay nakabalo naman ang killer kon asa ang lakaw niya, matod ni Quijano.
Gidasunan kini sa usa sa mga kawani sa hotel, kinsa nitug-an nga sa nakita sa ilang closed-circuit television (CCTV) nga nagpadaplin na daan atbang sa ilang hotel ang mga mamumuno, lulan og motorsiklo.
Dugang pa, ang gunman giingong nagsuot og itom nga hoodie samtang,ang drayber naka-full-faced helmet.
Dihang nakalapas na sa hotel si Yape ug iyang asawa, gisunod kini, dayon pusil sa pulis. Pagkahagba ni Yape, gipusil pa kini og kaduha. Nisibat dayon ang mga nagmotorsiklo paingon sa Escario.
Ang function nga gitambongan ni Yape kabahin sa procurement law ug procurement planning, nga nagsugod Nobiyembre 20 ug motapos Nobiyembre 22.
Sumala pa, puno na ang rooms sa hotel nga maoy venue sa function, hinungdan nga sa atbang nga hotel nag-abot ang magtiayon.
“After 5:00 pm, free na man gud sila nga molaag or asa sila molakaw. Kato sila Sir padung daw to sila mag-dinner sa iya wife sa Ayala,” saysay sa usa sa mga kawani sa hotel.
Hangtod alas 8:00 kagabii, blanko pa ang kapulisan sa motibo sa krimen.
Matod ni Quijano nga usa na sa ilang susihon ang kalabot sa trabaho niini, ilabi na sa dihang nadestino pa kini sa Sugbo.
Samtang, giila sa mga kauban nga buotan ug kugihan nga pagkapulis si Yape.
Sa Septiyembre 2017, iyang napa-surrender ang nailhan nga mga hitman sa lungsod sa Dumanjug. Mitahan ang mga hitman sa ilang mga armas nga walay lisensya.
Sa dihang siya ang nangulo sa Dumanjug police station, iyang gipangbisita ang mga barangay kapitan sa tibuok lungsod aron ipatahan ang ilang mga paltik nga armas.
Kapin 5,000 ka mga armas nga walay lisensya ang gitahan sa police station.
Lakip sa nitahan si Jerrick Torres, ang giingong nanguna sa pagpamusil sa Malalay sa Dumanjug.
Siya usab ang nangulo sa pagdakop kang Ricardo Ramirez, kanhi mayor sa Medellin, niadtong Hulyo 2017 pinasikad sa warrant of arrest nga giluwatan sa korte. (FMD, AYB, BBT)