Casimero mobugno Nobyembre 30

MOSAKA ibabaw sa ring si World Boxing Organization (WBO) interim bantamweight Filipino champion Johnriel Casimero nga biya sa dihang mosuway kini paglabni sa regular title ni WBO champion Zolani Tete sa 12-round main event fight nga ipahigayon karong Nobyembre 30, didto sa Birmingham, UK.

Kini gumikan kay gawas sa pagka-champion, ang 5-9 nga si Tete nakabintaha usab sa gitas-on sa barog ug ingon man sa gitas-on sa kasway niini.

Labaw sa tanan ang away anaa usab ipahigayon sa dapit nga gikonsiderar nga second home sa South African nga si Tete.

Hinuon, dili bag-o alang sa 30 anyos ug 5-4 nga Casimero ang pagsulong sa laing nasod ug ingon man ang pagpakigsangka sa kontra nga mas taas pa kaniya.

Biya man tuod siya sa tapad apan wala kini maka-us-os sa iyang moral ug gani iya kining gidawat nga dakong hagit sa iyang kapabilidad.

Ang lumad nga taga dakbayan sa Ormoc, nagdala og 28-4, 19KOs nga baraha samtang si Tete adunay 28-3, 21KOs nga record sa iyang kaugalingon.