ANG trabaho sa usa ka journalist mao ang pagpahibalo sa katawhan unsay mga nanggihitabo sa palibot. Pahibal-on ang katawhan aron sa ingon masayod sa mga angay buhaton ugaling dunay kalamidad ug ang pagpatimbang-timbang kinsay sayop o tama sa hisgutanan sa pagpangatungdanan diha sa gobyerno.
Salikwaot lang kay ang Pilipinas nagpakita sa hulagway ug sa kamatuoran nga dili luwas ang mga journalists labi na kung dunay maligsan sa komentaryo.
Sa laktud, dili kadawat ang usa ka tawo kung maligsan sa komentaryo, butang nga mobalos pinaagi sa pagpapatay hinungdan nga ang Pilipinas nalakip sa listahan sa pinaka-delikado nga nasud sa mga journalists sa tibuok kalibutan.
Sa miaging bulan, usa na sab ka miyembro sa mga tigbalita nga si Pat Lucero Pacquiao, commentator ug station manager sa RP-FM ang Radyo ng Masa ang mahunusan na unta sa kinabuhi human gipusil didto sa Davao del Norte.
Sa Tacurong City, maayo nalang kay nabuhi pa si Benjie Caballero ang station manager sa Radyo ni Juan human pusila sa wa mailhing mga mamumuno.
Gilayon sab kini nga gikondena sa Mindanao Independent Press Council (MIPC), “We reiterate that harming any member of the press for any adverse commentary is a dastardly act not worth of a civilized society. Should any member of the media profession go out of bounds in his or her commentary, the legal remedies remain the best option to exact accountability.”
Si Lucero anaa na sa luwas nga kahimtang samtang ang kapulisan padayong naghimo og makuting imbestigasyon sa krimen aron masayran ang tinuod nga motibo sa panghitabo.
Dili na matago sa hunahuna sa mga Filipino nga sa Pilipinas mahunusan gayod sa kinabuhi ang mga miyembro sa media labi na og dunay maligsan nga dagkong ngalan sa politiko ug adunahan nga tawo.
Mapanalipdan man sa gobyerno ang susama niini nga panghitabo pinaagi sa otoridad, apan daw kulang.
Kay kung di pa kulang, nganong mahitabo paman ang susama niini nga insidente? Usa na niini ang natigayong Maguindano Massacre nga mikalas og singkuwenta ka mga kinabuhi sa mga tigbalita diin mosumad napulo katuig, ugmang adlawa.
Manghinaut ang katilingban nga wala nay mahitabo pa nga susama niini nga insidente gumikan usa ka dakong insulto sa nasud nga dunay demokrasya, sama sa Pilipinas.