ANG Philippine Southeast Asian (SEA) Games Organizing Committee (Phisgoc) maoy responsable sa kontrobersiyal nga P55,920,000 nga 30th SEA Games nga kawa, diin ang Philippine Sports Commission (PSC) mipaguwa lamang sa pundo subay sa hangyo sa una.
Si PSC Chairman William “Butch” Ramirez nagsulti niini atol sa press conference sa Yellow Fin Restaurant sa Quimpo Boulevard sa Matina, Davao City, Nobyembre 20.
Suma sa opisyal nga ang kantidad gikan sa P6 billion nga alokasyon gikan national government alang sa paghost sa nasud sa aktibidad, pinaagi sa Phisgoc nga gitahasan sa pag-manage sa kinatibuk-ang dagan sa Games.
Ang P6 billion, giagi sa PSC.
“Napitik mi aning cauldron nga murag kami nagpahimo, ang Phisgoc man. Dili mi responsbile anang cauldron, ang Phisgoc man nag transact ana,” ni Ramirez.
Dugang sa opisyal nga ang Phisgoc nag-request og P55,920,000 alang sa kawa nga gidesinyo sa mipanaw ng national artist Francisco Mañosa.
Suma pa, P4,400,000 design cost, site construction sa pundasyon sa kawa P13,440,000, physical construction ug instalasyon sa kawa P32 million ug wrist tags P6 million.
Batbat ni Ramirez nga atol sa Senate hearing, Nobyembre 19, si Senator Franklin Drilon nangutana kaniya kung ang kawa mipasar sa bidding requirements sa gobyerno.
“I replied, ‘I cannot answer that your honor, Phisgoc has to answer that.’”
Dugang niya, “basin di kami nag abuso, maapil gihapon mi. Muuban mi sa COA mugukod sa Phisgoc.”