MAPAHUNGAW na gyud unta ang tinguha sa taga Englis-Banawa, Guadalupe, kon wa pa temporaryong napakgang ang plebisito nga gikatakda karong adlawa.

Ila na gyud untang hukman kon uyon ba sila nga mahimong kaugalingong barangay ang ilang dapit, gawas sa Guadalupe.

"The Manny Pacquiao Blog". Click here for stories and updates on the Filipino boxing champ.

Apan sa kalit lang nabaraw ang tinguha, human pabori sa korte ang petisyon sa usa ka ba-rangay konsehal sa Labangon nga si Victor Buendia kansang residensiya sa Rosalina Village nalakip sa habig sa Banawa-Englis, basi sa boundary.

Dunay bulok sa pulitika ang pagpasaka og petisyon ni Buendia kay nagtuo siya nga kon ma-barangay na ang Banawa-Englis, technically di na siya makadagan pagka-barangay kapitan sa Labangon. Hinuon wa siya mapakyas sa iyang tinguha kay gihatagan man ni RTC Judge Gabriel Englis og gibug-aton ang iyang petisyon.

TAPHAW

Taphaw kaayo ang katarungan ni Buendia nga ang tuyo sa iyang petisyon mao lang ang pagtino ug pag-settle sa boundary tali sa Guadalupe ug sa Banawa-Englis.

Nganong karon man lang sab siya mopasaka og petisyon nga napulo na man na ka tuig nahibaw-an ang boundary unya napublikar man sab na sa mga mantalaan atol sa public hearing?

Sala ba diay na sa kinabag-ang molupyo sa Banawa-Englis kon nagdanghag siya ug nagtulogtulog sa pansitan kay wa man siya makahibawo sa boundary?

Nganong moreklamo man dayon siya nga plebisito pa man ang ipahigayon ug di pa man kini makaapekto sa iyang pagka official ? Wa kahay nagpahipi taliwala ning kalit niyang pagpasaka og petisyon nga nakapasagmuyo sa kadaghanan?

Makapakaging usab kining desisyon ni Judge Englis kay iyang gipalabi ang usa ka tawo kansang tumong ug tuyo alang lang sa iyang pulitikanhong interes kay sa mga tawo sa Guadalupe-Englis kinsa kapin na sa 23 ka tuig naghandom ug naglantaw sa ilang kaayuhan ugma damlag.