WOW! Kanindot paminawon ning gipanghambog sa atong mga sports leaders nga labing minus 220 ka mga gold medals ang mahagdaw sa nasod sa 2019 Southeast Asian Games nga sugdan karong Nobiyembre 30.
Kini maoy ilang nakab-ot nga panagna atol sa coordination meeting sa mga National Sports Association (NSA) uban ni Philippine Sport Commission (PSC) chairman Butch Ramirez didto sa Kaulohan.
Siguro grabing nakapasalig ang mga coaches sa nagkadaiyang events atubangan ni Ramirez ug sa ubang sports official mao nga di ta ka basol kon nganong niabot og kapin 200 ka mga gold medal ang ilang target.
Sa arnis, sa 20 ka events ilang nalantawan nga 15 niini siguro na ang gold, samtang ang judo, kickboxing, jiujitsu, sambo, wrestling ang tagsa-tagsa usab nga misaad og lima ka gold medals ang pinakaminos.
Ang national team sa boxing, wushu, taekwondo ug dragon boat, wa mosaad ug pila ka gold pero base sa track records niini sa miaging mga SEA Games, nakapakita usab kini og saktong dominasyon.
Sa dancesports, 10 sab kuno ka gold medals ang ilang gisaad, samtang ang athletics ug gymnastics pinakaubos na nang siyam ka gold.
Haruson sab sa skateboarding ang walo ka event sa maong competition.
Ang ubang mga gold medals nagagikan sa archery, billiards, bowling, chess, cycling, fencing, golf, ice skating, karatedo, muay thai, pencak silat, sailing, sepak takraw, shooting, tennis, weightlifting ug windsurfing.
Ila na usab giapil og kuwenta ang mga team sports sama sa baseball, basketball, ice hockey, rugby, softball ug polo nga makatampo sab og gold medals.
Sa 56 ka mga sports, 530 ka mga events ang pagatigi-an sa 11 ka mga nasod sa maong kompetisyon.
Unya kay siguro na man ta og 220 ka mga gold medals (matod pa nila), sa ato pa 310 na lang ka gold medals ang ilogan sa laing 10 nga mao ang Indonesia, Thailand, Malaysia, Brunei, Myanmar, Vietnam, Singapore ug Timor-Leste.
Kon angayon sa pagbahin, mahug nga tag 31 na lang ka gold medal ang ilaha.
Di man tuod ni imposibli nga mahitabo, pero ambot og alang kaninyo katuohan ba ni ilang gipanghambog.
Niadtong 2005, sa unang higayon ang Pilipinas nahimong overall champion ning matag duha ka tuig nga international events.
Isip host usab niadtong higayona, ang Pilipinas mihagdaw og 113 ka gold medals sa 291 ka mga medalya aron mamahimong overall champion.
Kon gidaghanon sa medalya ang hisgutan, kadto maoy pinakadaghan kon itandi sa ubang mga nasod nga nahimo usab nga overall champion.
Pero sukad niadto, ang labing taas nga naabot sa Pilipinas mao ang ikalima ra nga puwesto. Gani sa niaging duha ka tuig, nius-os ta sa ika-unom nga luna.
Usa sa dakong nakatampo niini, mao ang conflict sa atong mga leaders ug ang grabing pulitika sa sistema sa atong sports program.
Pananglitan, ang kaguliyang nga mihapak sa Philippine Olympic Committee (POC) nga bag-o lang ganing naresolbar. Lisod tuohan nga kini wa makaapekto sa preparasyon sa atong mga atleta kay maayo man pagkasiak ang mga sports association niadtong higayona.
Mao nga ako mismo, sama sa akong gikahinabi nga sports official ra usab sa nasod, makaingon nga layo ra sa tinuod ning ilang pasiatab.
Kon magpala-om man gani ta sa mga tawo kanang duol sa katinuoran. (jun.migallen22@gmail.com)