NAHITSAS na ang mga partisipante sa gikahinaman nga Chauncey Open Basketball League 2019 nga gikatakdang mosugod sa Martes, Nobiyembre 26, diha sa Mayor Panphil B. Frasco Sports Memorial Complex sa lungsod sa Liloan, Cebu.
Sa press conference nga gipahigayon sa Sunburst-Mango, Huwebes, Nobiyembre 21, ang mga nangpasiugda mibutyag sa walo ka mga teams nga miitsa sa ilang kompirmasyon sa pagsalmot sa lega nga nagtangag og ganting salapi nga dul-an sa P200,000.
Ang mga mikompirmar mao ang San Remegio, Kiboy’s Computer Solutions, Penthel Hardware ug LGU-Bogo City nga maoy molangkob sa Group A samtang ang Fighter Wine, KCS 2.0, Aguila ng Lapu-lapu City ug Sumisetsu Phils. Inc. mao usab ang magtipo sa Group B.
Si Edzel Vallena, deputy commissioner, ug commissioner Tyrone Anthony Bayle, nagkanayon nga sundon sa torneyo ang single round robin format sa matag bracket diin ang top 2 sa matag grupo maoy mag-abot sa semifinals round diin ang mananaog maoy magsangka alang sa kampiyonato.
Gawas sa tropeyo, ang makampiyon makadawat og P100,000 samtang P50,000 ang sa runner-up ug P20,000 usab ang third placer.
Ang duwa ipahigayon matag Martes, Huwebes, Sabado ug Dominggo. (JBM)