3 ka Beermen suspendido

MADAG-umon og malisod nga dalan ang subayon sa San Miguel Beer sa ilang kampanya nga makaangkon og laing Grand Slam title sa PBA sa karon nga season.

Kini human nga taliwala ning nagpadayon nga PBA Governor’s Cup, ang San Miguel management misuspenso sa ilang tulo ka mga local players ug mipapauli sa ilang orihinal nga import nga nalambigit sa kagubot nga mitumaw atol sa ilang praktis niadtong Dominggo sa The Upper Deck sa Pasig City.

Ang gipahamtangan og indefinite suspension mao sila si Arwind Santos, Ronald Tubid ug Kelly Nabong samtang niadtong Martes ang import nga si Dez Wells gikataho nga milupad na og balik sa US.

Niini si John Holland, ang import nga gipuli sa Beermen sa dihang nagpaalim si Wells sa iyang injury, ang magpadayon nga mo-reinforce sa San Miguel.

Nagdugang sa kangi-ob sa ilang kampanya mao ang pagpakigsangka sa sister-team ug crowd-favorite Ginebra San Miguel sa quarterfinals human sa ilang kapildihan sa TNT KaTropa niadtong Miyerkules, 114-109.

Ang Ginebra (no. 4) maoy nakakuha sa twice-to-beat incentives samtang ang Beermen natagak sa ikalima nga puwesto.

Ikasangka sa TNT ang no. 6 nga Magnolia Hotshots sa laing kulbahinam nga quarterfinals matchup. Ang Katropa (no.3) mao usab ang nakaangkon sa twice-to-beat advantage.

Magtigi usab ang second-ranked Meralco ug ang no. 7 Alaska Aces ug ikaharong usab sa top-seed NLEX Road Warriors ang eight-seed NorthPort Batang Pier sa quarters.

Sugdan ang San Miguel-Ginebra matchup karong Dominggo human sa duwa tali sa Alaska-Meralco encounter sa Araneta Coliseum sa alas 4:15 sa hapon.

Nabalaka si San Miguel coach Leo Austria sa ilang sitwasyon karon kay gawas nga gihamok og kagubot ang ilang team, ang Ginebra mao man usab ang nagpakgang sa ilang kampanya sa Grand Slam title niadtong 2017.

Apan bisan pa niining tana, si Austria pabilin nga malaumon. (JBM)