GIBANTOG nga maayo mangugita si Israel sa ilang dapit sa baryo Mayupay. Daghan ang nakadayeg kaniya tungod sa iyang kusog. Kusgan siya nga pagka tawo. Wala ra sa iyang kumingking ang ubang mga mananagat sa ilang dapit kon bahin sa panakop og kugita ang hisgutan. Daghan ang nasina kaniya. Bisan unsa ka dako ang kugita nga iyang makita, iya kining lutuson hangtod nga maglinayugay sila. Dili magdugay makuha kini dayon ni Israel nga gikahibulong sa mga mananagat sa ilang dapit. Ang kauban niyang mga mananagat dili gayud makahimo niini tungod sa kakusgan sa mga dagkong kugita.
Daghan ang mga suki si Israel nga nagsaad kaniya nga maoy mopalit sa kuha niyang mga kugita inig lugsong niya paingon sa dagat. Usa si Mr. Tan nga tag-iya og restawran sa ilang dapit sa siyudad sa Sugbo. May anak nga dalaga si Mr. Tan, si Meca, nga bag-ong mi-gradwar sa HRM. Hilom nga nahigugma si Israel sa dalaga.
Usa ka buntag niana nahiagi si Israel sa mansiyon ni Mr. Tan. Naglugsong siya paingon sa dagat aron pagpangugita. Iyan nakita si Meca nga namisibis sa mga mesitas sa nataran sa mansiyon. Nasingo ni Israel ang kahumot ni Meca ning buntaga. Misamot ang iyang kaibog sa dalaga dihang mitan-aw kini kaniya ug mipahiyom.
“Hoy, Israel, asa ka man paingon nga buntag sayo pa man karon?” matod ni Meca.
“Moadto kog sayo sa dagat, Meca,” tubag ni Israel, “aron daghan kog makuha nga kugita. Nagsaad man god ang imong amahan og dagkong kugita alang sa inyong restawran ug kinaham sa inyong mga kustomer.”
“Mao ba?” ni Meca.
“Gusto ni Mr. Tan nga makuha ko ang higanteng kugita. Ug miingon siya nga kon makuha ko kini mosugot siya nga mangasawa ko nimo,” ni Israel.
“Hahaha! Nangambisyon ka man, uy, Israel!” ni Meca. “Gikomedyahan ka lang ni Papa, uy! Mangasawa god tawon! Makuha kaha nimo ang higanteng kugita nga kusgan man kini kaayo?”
“Buhaton ko ang tanan, Meca, tungod sa akong dakong gugma kanimo! Bisan og nagkahulogan kini sa akong kamatayon!” panaad ni Israel.
Apan ang tanan duwa-duwa lang ni Mr. Tan. Dili siya motugot nga mahiadto si Meca sa usa lamang ka mananagat nga timawa.
Dihang didto na si Israel sa lawod misugod pagkuba-kuba ang iyang dughan. Gikulbaan siya. Matod pa sa mga kauban niyang mananagat daghan nang nakalas nga mga kinabuhi tungod kay nangalumos sila kay wala makapiog sa higanteng kugita.
Giandam ni Israel ang iyang baraw ug pana. Unya misawom siya paingon sa kailadman sa dagat aron pangitaon ang higanteng kugita. Wa siyay kasayuran nga naniid diay si Mr. Tan kaniya sakay sa bangka niini taliwala sa lawod. Gustong makita ni Mr. Tan kon unsaon pagpatay ni Israel ang higanteng kugita. May dala siyang teleskupyo.
Didto sa ilawom sa dagat nakita ni Israel ang dakong kugita. Ang mga gaway niini milikos sa tibuok lawas ni Israel. Wala magsilbi ang dala niyang baraw ug pana kay hilabihan kakusgan ang higanteng kugita. Unya, napanlantawan niya ang panagway ni Meca nga matahom. Naghatag kinig inspirasyon kaniya. Dili siya makatugot nga mapukan siya sa higanteng kugita nga gipanaad niya kang Meca nga kuhaon. Unya, hinurot ang kusog gilubag ni Israel ang mga gaway sa kugita.
Gisakitan tingali ang kugita kay dali man kining mipahilayo ug didto mopaingon sa bangka ni Mr. Tan. Hilabihan ang gibating kalisang ni Mr. Tan nga nagpaninggit og pakitabang. Daling milangoy si Israel paingon sa bangka ni Mr. Tan nga hapit na malunod kay gikapyutan sa mga dagkong gaway sa higanteng kugita. Dali nga misibat ang higanteng kugita paghikakita niini kang Israel. Daw nahadlok kini kang Israel. Nahibulong kaayo si Mr. Tan.
“Iarael, salamat sa pagluwas mo kanako!” matod ni Mr. Tan. “Utang ko kanimo ang akong kinabuhi. Mosugot ko nga magpakasal na mo si Meca.”
Paglabay sa usa ka bulan gikasal sila si Israel ug Meca. Ug paglabay sa katuigan gitugahan sila sa Kahitas-an og tulo ka anak. (Katapusan)