BISAN tuod morag lisod masunod ang lakang sa Venezuela nga sukad mao ray nakahimog duha ka nagsunod nga kadaugan sa Ms. Universe, pero morag di layo ang posibilidad nga ang mosunod sa trono ni Ms. U 2018 Catriona Gray usa gihapon ka Pinay, si Gazini Ganados.
Lisod sundon ang gihimo ni Catriona pero may pamaagi usab si Gazini nga iya ra gyud. Di sab malalis ang kaanyag ni Gazini nga may dugong Palestino.
Sa Disyembre 9 na ang bangga. Atong suportahan si Gazini pinaagi sa atong pag-ampo ug sa ubang paagi.
•••
Tungod lagi kay Coco Martin na ang akong peg (probinsyano), di na kaayo ko updated sa mga kalambuan sa natad sa kalingawan labi na sa gabii.
Niadtong niaging semana, nakakuyog ko sa hair and make-up authority nga si Jun Esma ug nakabalik ko sa Slabadu. Nagpabilin nga lig-on ang Firelights nga gibidahan sa magtiayong Bogart ug Willie Ygot.
Nadugang ang kanhi talent ni anhing Al Evangelio nga si Julie Ann. Nindot ang ilang repertoire sa unang set. Nindot gihapon ang saxophone line-up ni Geoffrey Yu sa ikaduhang banda.
Wa na hinoon mi nihuwat sa ikaduhang set kay nilayat mi sa 18th Avenue dayon sa Kizmix Club. Natagbaw gyud hinoon mi sa maong laag.
•••
Nalingaw ko nga nakighimamat sa mga higala gikan sa Kapitolyo (Tourism Officer Marti Ybañez, Kathy Navarro, Chai Ompoc, Sherrylyn Perez, Sikay Plaza, Tanjee ug uban pa) dihang nihapit sa Oslob ang Suroy Suroy Sugbo niadtong Nob. 16.
Syempre nahimamat ko usab si Gob. Gwen Garcia nga akong gitimbaya og “welcome to my hometown.” Feeling opisyal sa lungsod. Haha!
Kining pagdagsa sa mga turista sa Cebu, labina sa habagatan, resulta na kini sa Suroy Suroy Sugbo niadtong pang unang tulo ka termino ni Gob. Gwen.
•••
Sulod sa kapin sa 10 ka tuig, ang Sadsad Festival sa Poblacion lang ang nag-inusarang barangay festival sa Oslob. Karong tuiga, may bag-ong nahimugso: ang Tan-awan Festival sa barangay nga nabantug sa mga tuki (whaleshark).
Sa bespiras sa pista sa Tan-wan (Birhen sa Regla ang patron), gihimo ang pagpili sa Tan-awan Festival Queen. Sa adlaw sa pista mismo, gihimo ang ritual showdown sa pito ka mga contingent.
Malampuson ang pagsaulog. Take a bow, direktor Jaypee Cabigon!
Ang nakulang lang mao ang street dancing kay way lugar pero basin mahimoan kinig solusyon sa sunod higayon. Mga pahalipay sa mga opisyal nga nangulo sa kalihukan!