KADUDAHAN gayud tinuod nganong magkapareho ang presyo kon mopataas ug mopaminus sa presyo sa mga produkto sa lana ang mga oil companies. Ang consumer rights advocacy group, Laban Konsyumer, Inc. (LKI) mipadala og reklamo sa buhatan sa Philippine Competition Commission (PCC) sa pasangil nga petroleum price fixing, cartel, ug collusion sa 15 ka mga oil companies ug sa Department of Energy (DOE). Sumala ni LKI president Vicente Dimagiba nga ang oil companies misud og pricing agreements nga maoy nagpugong sa kompetisyon sa pagpamaligya sa ilang mga produkto. Nakapangutana siya nganong ang mga dagku ug gagmay nga oil companies mo-adjust sa ilang presyo nga parihas.
Ilang gitumbok ang Philippine Competition Law kun Republic Act 10667 nga nagdili sa sabut-sabot sa presyo nga makapugong sa kompetisyon. Ila usab nga gihisgutan ang Downstream Oil Industry Deregulation Law kun Republic Act 8479 nga nagdili sa cartel ug monopoliya sa maong industriya.
Ang reklamo gipasaka batok sa 15 ka mga oil companies: Chevron Phillipines, Inc., Petron Corp., PTT Philippines Corp., Pilipinas Shell Petroleum Corp., Total Philippines Corp., SeaOil Philippines, Inc., Phoenix Petroleum Philippines, Inc., Unioil Petroleum Philippines, Inc., Jetti Petroleum Inc., Eastern Petroleum Corp., City Oil Philippines, Inc., Filpride Energy Corp., Clean Fuels Philippines, TWA, Inc., ug Petrogas Ventures Corp.
Ang LKI mipasaka usab og reklamo batok sa DOE tungod sa pagtugot niini sa mga oil companies nga maghimo og price fixing, cartel, ug collusion sa pagamit sa pricing formula nga maoy nagpugong sa kompetisyon sa merkado.
•••
Daghang pasahero og taxi ang mipaabut og reklamo diri kanako.Tungod niini ako kining giklaro sa akong suki nga taxi driver nga si Roger Sacares. Ania kining iyang pahayag: Ang flagdown inigsakay nimo og taxi P40. Mapun-an kinig P2 matag usa ka minuto Gawas niini, mapun-an pa gayud kini og P13.50 matag usa ka kilometro nga gilay-on. Nagpasabut kini nga mas daku ang imong plitihan kon adunay trapik sa dalan kay mopatung man ang P2 matag minuto bisan dili magdagan ang taxi. Hinaut pang tungod niining maong katin-awan dili na maglalis ang pasahero ug taxi driver. Daghang mga pasahero ang nagtuo nga gitikasan sila labi na kon dili kaayo sila kakita sa taximeter.
•••
Tinuod ba kining impormasyon nga akong nadawat nga upat sa lima nga itudlo kuno nga mosunod nga mga sakop sa board of directors sa Metropolitan Cebu Water District (MCWD) mao sila si kanhi Cebu mayor Atty. Alvin Garcia, South Road Properties (SRP) manager Atty. Joey Daluz, columnist Atty. Frank Malilong, ug Mike Patu sa Office Presidential Assistant for the Visayas (OPAV)? Daku ang akong pagtuo nga si Garcia maoy matudlo nga board chairman apan dili man diay tingali. Sumala sa akong info nga si Daluz maoy itudlo nga mosunod nga chairman. (mannyrabacal1144@gmail.com)