DAKPON sa kapulisan kadtong mga tawo nga magpabuhot og mabagang aso sa mga pangpublikong lugar. Nunot kini sa ban nga gimando ni Presidente Rodrigo Duterte sa mga e-cigarettes ug vaping sa tibuok nasod.
Gimandoan sa pangulo ang tanang mga law enforcement units niadtong Martes nga sikupon ang mga vape users ug e-cigarette smokers sa mga pangpublikong lugar. Gimando usab niya ang ban sa importation sa mga e-cigarettes.
Ang gibasihan sa presidente mao ang pagkonpirmar sa Department of Health (DOH) sa usa ka kaso Sugbo nga usa ka 16-anyos nga dalagita ang nahospital tungod sa lung injury kansang hinungdan mao ang paggamit sa vape.
•••
Apan kadto rang mogamit sa vape ug e-cigarettes sa mga pangpublikong lugar ang pagasikopon. Ang pangulo mismo miingon nga ang mga tawo mahimong mogamit sa maong mga paagi sa pagtabako didto sa ilang mga panimalay.
Di sila hilabtan sa kapulisan kon sud ra sa ilang balay. Matod pa sa presidente, “Meaning to say, the safest way to do it is in your house. But if you are not that stupid, when you do that, you contaminate all including your children in the family.”
Didto sa Estados Unidos sa Amerika, mokabat na sa usa ka dosena ang gikatahong nahospital ug namatay tungod gitawag nga e-cigarette, or vaping, product use-associated lung injury (Evali).
•••
Dinhi sa Sugbo, gisugdan na sa kapulisan ang pagsakmit sa mga vapes ug mga e-cigarettes. Ang uban gisurrender sa mga tag-iya. Wa pa una dakpa ang nigamit niini samtang giklaro pa ang legal basis sa pagsikop.
Usa ka retired Regional Trial Court executive judge, si Meinrado Paredes, niingon nga kon way balaod nga naghimong illegal sa paggamit sa vape ug e-cigarettes, way legal basis ang pagsikop sa mga users.
Apan ang pangulo niingon nga adunay balaod nga nagdili sa pagsabwag og toxic materials sa mga pangpublikong lugar. Tingali, maigo ang mga users sa sa vape ug e-cigarettes sa Clean Air Act.