GITINGUHA karon sa Cebu City Traffic Operation (CCTO) nga mabalik kanila ang paghimo og sketch sa mga insidente sa bangga sa kadalanan sa dakbayan sa Sugbo.
Si retired Lieutenant Colonel Andres Bayarcal, operations chief sa CCTO, nagkanayon nga sa dihang gibalik sa traffic police ang paghimo sa sketch sa usa ka vehicular accident nakamugna kini og kahuot sa dagan sa trapiko tungod sa kadugay nga maka responde sa mga pulis.
Nakasabot usab si Bayarcal niini tungod sa kakuwang og tawo sa PNP nga maoy gitahasan nga moimbestigar sa mga insidente sa bangga sa mga sakyanan.
Plano ni Bayarcal nga ang CCTO ang mo-drawing ug ang pulis na ang moimbestigar.
Mas dali usab ang pagkuha sa nagbangga nga sakyanan tungod kay naa na sa kadalanan ang traffic enforcers nga maoy nag-giya sa dagan sa trapiko.
“Ang CCTO personnel naa na man gud daan sa dalan so ang insidente duol na kaayo nila dali ra kaayo pag-respond. Whereas og ang police ang mo sketch lack man gud ug personnel ang CCPO,” matod ni Andres Bayarcal.
Isugyot ni Bayarcal ang maong plano sa konseho sa siyudad sa Sugbo pinaagi ni kapitan Philip Zafra aron matuki kini sa kagamhanan sa dakbayan.
Gipasabot ni sa CCTO operations chief nga tungod sa kadaghan na sa sakyanan sa dakbayan apan gamay lang gihapon ang kadalanan nga kung adunay bangga dako na kaayo kinig epekto.
Tinguha nila nga sa labing dali nga panahon kung adunay panag singki sa dalan makuha dayon kini aron mobalik sa normal ang dagan sa mga sakyanan.
Apan si Police Colonel Geovanie Maines ang officer in charge sa Cebu City Police Office nagkanayon nga iya una kini hisgutan uban sa iyang mga sakop.
Usa sa iyang gikahadlokan kung ang sketch drawing sa CCTO personnel madawat ba sa korte.
Tungod kay sa balaod ang otorisado lang nga personnel sama sa police ang mihimo niini ug mo imbestigar sa mga insidente sa panagbangga.
Panahon ni Police Colonel Royina Garma iyang gi bawi ang trabaho sa CCTO nga matod pa maoy trabaho sa police.
“For that matter I will consult my investigators at pag usapan namin then I will also consult with our legal officer.” Pasabot ni Colonel Geovanie Maines.
Kung aduna nay pagtugot sa CCPO ug sa kagamhanan sa dakbayan sa Sugbo ipaubos sa training ang mga bag-ong traffic enforcers alang sa pag himog sketch sa mga sakyanan.
Sa pagkakaron, ang paghimo sa sketch gisangon sa traffic group sa kapulisan apan dili dayon makatubag sa alarma tungod sa kakuwang sa personahe.
Ang traffic enforcers sa CCTO naa kanunay sa kadalalanan apan dili makapairog dayon sa naapektadong sakyanan anga nalambigit sa aksidente tungod sa kakuwang sa sketching sa kaso.
Mao kini hinungdan sa mga paghuot sa trapiko sa kadalanan panahon sa aksidente, apan walay maimo ang enforcersa gawas sa pagpaabot sa traffic group sa kapulisan. (AYB)