GIHATAGAN ug duha ka semanang tagal karon ni Gobernador Gwendolyn Garcia ang mga opisyal sa Department of Public Works and Highways (DPWH) nga masuta pag-usab ang mga intersections sa tulo ka mga agianan nga mao ang Cebu South Coastal Road (CSCR) habig sa dakbayan sa Talisay, Lungsod sa Consolacion ug Minglanilla nga maoy gitan-aw sa Provincial Traffic Board nga kanunay makasinati ug huot nga sitwasyon sa trapiko.
Kini human wa mauyoni sa Gobernador ang proposal nga gipresenta sa DPWH kabahin sa planong roundabouts o U-turn slots nga maoy gilaraw nga makatabang pagsulbad sa kahuot sa trapiko.
Atol sa labing una nga Cebu Traffic Management Board (CTMB) meeting gahapon, Nobyembre 21, 2019 tulo ka mga puntos maoy gihatagan og pagtagad sa mga opisyal kon mapatuman ang u-turn slots.
Buot sa CTMB nga ipatuman na unya ang mas mubo nga speed limit sa kadalanan, gawas niana wala na usa’y tugutan nga mulabang sa National Roads ma-sakyanan, tricycle o tawo aron malikayan ang paghunong sa mga sakyanan ug ang mas daghang disgrasya. Lakip na ng gilaraw nga pagpatuman sa no parking, no stopping, 50 metros gikan sa U-turn slot.
Aron usab nga mabantayan ang mga traffic violators, gitahasan ang Highway Patrol Group (HPG) sa pagdakop sa mga makalapas sa balaod sa trapiko.
May 39 lang ka mga tawo ang HPG, diin walo niini ang ubos sa probinsya, tungod sa menos nga gidaghanon sa mga personnel lakip usab sa gitahasan ang kapulisan sa Probinsya nga motabang sa pagpanakop.
Gibutyag ni Police Captain Michael Gingoyon, HPG Provincial Chief nga mi-request na sila ug dugang personnel pagpangandam sa plano sa CTMB.
“As of now nag request nami sa among course multiplier or forces sa HPG considering nga gamay ra gyud ang nag cover sa Region 7 particularly in Cebu and Province. Kung kaya maka additional unta 30 or 40,” matod ni Gingoyon.
Samtang si Engr. Edgar Tabacon, DPWH Regional Director mipadayag nga ilang susihon pag usab ang mga intersections nga mamahimong mabutangan ug U-Turn slots o roundabouts ug dili kinahanglan nga mahal ang gastuhon sa probinsya.
“For now what the Governor wants is an immediate solution to traffic, these are the congested areas the choke points that do not need big amount of budget, doable in a short period of time,” matod ni Tabacon.
Karon Disyembre 12, 2019 gikatakda nga mupresenta pag-usab ang DPWH sa CTMB ug susihon niini kon mahimo na ba nga ipatuman ang maong proyekto.