SUPERBALITA CEBU

Ahong mihangyo sa netizens, Akrho; CHR motabang na sa imbestigasyon

NANAWAGAN si Lapu-Lapu City Mayor Junard “Ahong” Chan sa mga sakop sa Alpha Kappa Rho (Akrho) ug mga netizens sa paghunong na og sumpay sa mga istorya o kaha pagbuhi og mga bati nga komento sa social media.

Kini kalabot sa kagubot tali sa Akrho ug sa mga sakop sa Police Station 3 sa Lapu-Lapu City Police Office (LCPO) niadtong kaadlawon sa Nobiyembre 17, 2019.

Giluwatan ni Chan ang panawagan sanglit nabantayan sa mayor nga daghan ang mga niapil na sa isyu pinaagi sa pagpadayag sa ilang opinyon sa social media kalabot sa hitabo.

Katungod man tuod kini sa tanan apan ang dili maayo niini mao ang mga pagkomento ug bati batok sa Akrho o ba kaha sa kapulisan nga mosangpot na hinuon nga moinit pagbalik ang isyu.

Ang nakapabalaka ni Chan mao usab nga ang uban sa mga komento o gipakatap nga impormasyon kalabot sa hitabo pulos mga walay kamatuoran nga makapaaghat na hinuon sa mga hingtungdan nga moinit pagbalik.

Si Chan nakabasa og post sa social media nga adunay sakop sa Akrho nga giingong gikulata na usab apan sa pagsusi ni Chan sa kadagkuan sa fraternity wala diay kini kamatuoran.

“The Akrho group had their own page nga makita sa tanan unya ug duna ihatag nga fake na news posible lain-lain og reaction ang mga sakop sa Akrho posible ang uban masuko dayon pero di diay tinuod so maamong-among lang ba,” matod ni Chan.

Ang duha ka sakop sa Akrho nga sila si Paul Jay Pogoy ug Danilo Taghoy nadapatan sa mga sakop sa Police Station 3 human giingong mi-interbener sa usa ka police operation nahinabi na ni Chan isip kabahin sa iyang kaugalingong pakisusi sa hitabo.

Nakita na usab ni Chan ang duha ka video nga mikatap sa social media nga nagpakita sa habig sa duha ka kampo apan dili lang una siya mohatag og komento kalabot sa iyang nakita sa duha ka video.

Itugyan na lang ni Chan ang hukom unya kun kinsa ang manubag o sad-an sa hitabo sa gipahigayong imbestigasyon sa LCPO batok sa mga pulis.

Samtang, andam motabang ug mopahigayon og imbestigasyon ang Commission on Human Rights (CHR) sa maong hitabo.

Matod ni Leo Villarino, special investigator sa CHR, naghuwat pa sila nga ang mga biktima moadto sa ilang buhaton aron masugdan na ang imbestigasyon apan wala pay niadto kanila.

Nanawagan sila sa mga biktima nga moadto na sa ilang opisina aron masugdan na ang imbestigasyon sanglit nanginahanglan sila sa dakong kooperasyon niini.

Gihangyo usab kini niya nga magpakita na ug magdala sa ilang medical certificate kung kini willing makigkoordenar ang kanila a imbestigasyon.

Iya usab gidepensahan ang mga kapolisan nga kini usa ka indibiduwal nga kaso nga angay susihon ug dili hutdon og basol ang tanan kapolisan sa kaso sa duha ka pulis sa Lapu-Lapu. (GCM, JCT)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph