PAGPAWONG sa signal sa telephone companies atol sa mga kalihukan sa Sinulog ug paghatag sa hugot nga seguridad ang natuki atol sa unang coordinating conference nga gihimo sa Cebu City Police Office (CCPO) ug mga opisyal sa Sinulog Foundation Inc. (SFI).
Nagsugod na sa pagpangandam ang kapulisan inubanan sa mga stakeholder alang sa dakong kalihukan sa Sinulog 2020 diin hugot nga siguridad ang ilang ipatuman.
Atol sa unang coordinating conference nga gipatawag sa CCPO ug sa Sinulog Foundation Inc. (SFI), usa sa ilang gituki ang pagpawong sa signal sa tanang telephone companies atol sa mga kalihukan sa Sinulog.
Matod ni P/Col. Geovanie Maines, officer-in-charge sa CCPO, usa lang kana sa ilang isugyot nga ipatuman tungod kay nahimo kining epektibo sa pagpatuman sa seguridad sa mga nanglabay nga Sinulog ug mga dagkong kalihukan event sa Sugbo.
Si Konsehal Dave Tumulak, SFI executive committee chairman, nagkanayon nga usa sa ilang gitinguha sa maong meeting nga ang pagpangandam alang sa mas hapsay ug luwas nga kasaulogan sa sinulog.
Iyang gitug-an nga aduna silay gipang-usab sa paghatag ug pagtugot sa mga concert party. Sa milabay nga Sinulog gitugotan sa kagamhanan sa dakbayan ang open areas.
Apan karon iyang gisugyot sa mga party organizers nga didto himuon sa sulod sa malls ang ilang kalihukan aron luwas ang mga mosaksi niini ug malikayan ang insidente sa milabayng Sinulog diin adunay namatay tungod sa pagka-drug overdose.“Naa tay innovations nga gisugyot. One, kining mga concerts should be inside sa malls for the reasons. Sa malls naa silay kaugalingong bomb sniffing dogs. They have their own metal detectors,” dugang ni Tumulak.
Aron usab nga dili magtapok sa siyudad sa Sugbo ang bul-og sa daghang tawo ipabahin usab nila ang mga kalingawan nga himuon sa mga silingang dakbayan.
Matod niya nga dili lang alang sa taga dakbayan sa Sugbo ang mga kalingawan mahimo usab kini nga saksihan sa mga batan-on sa mga dakbayan sa Mandaue, Lapu-Lapu ug Talisay.
Si Maines hugot usab nga mopatuman sa liquor ban atol sa Sinulog grand parade tungod kay usa ni sa hinungdan sa kagubot ilabi na nga mangahubog na.
Wala usab silay tugotan nga makapalupad og drone sa rota sa Sinulog gawas kung adunay pagtugot sa kadagkoan sa kapulisan sa pinili nga lugar. (AYB)