SUGDAN na pagdakop ang mga tawo nga mogamit og vape, labina sa publikong mga lugar, human momando si Presidente Rodrigo Duterte. Ang mando sa Presidente iyang giluwatan human ang usa ka babayeng teenager dinhi sa Sugbo nakaangkon og kadaut sa baga tungod sa vape.
Una kining kaso dinhi sa nasod nga nagpakita nga ang vape momugna og kadaut sa baga, sama sa sigarilyo.
Sa Estados Unidos, 42 ka mga kamatayon gibasol ngadto sa vaping. Tungod unta niini, nagplano si Presidente Donald Trump sa pag-ban sa vaping apan, niatras tungod sa kahadlok nga siya mawad-an og botos.
Sa Canada, dunay 17-anyos nga hapit mawagtangi sa iyang mga baga human sa lima ka buwan nga grabeng paggamit sa vape.
Dinhi sa Pilipinas, nagkadaghan ang mga establisemento nga nagtanyag og vaping. Tungod sa higpit nga kampanya sa kagamhanan batok sa pagpanigarilyo, labina sa pampublikong mga lugar, nagka popular dinhi ang vaping.
Maayo man ang tumong sa mando ni Duterte apan, ang nakaparat lang kay wa pay balaud batok sa vaping. Makadakop man tuod ang mga pulis sa mag-vaping pero, kutob ra sa pag-blotter.
Mas labing maayo kon ang mga magbabalaud mopalabang og balaudnon samtang wa pa makakakuyanap og maayo ang vaping dinhi sa nasod. Kasagaran sa mag-vape kadto rang maka-afford ug kadtong makapalit sa e-cigarettes.
Di na angay pang magduha-duha ang mga magbabalaud nga ang vaping makadaut sa lawas sa tawo, sama sa sigarilyo. Wa pa lang makatala og klarong data dinhi sa nasod nga magsuporta nga makadaut kini sa panglawas kay linghod pa ang vaping dinhi sa Pilipinas. Sa abroad, duna nay mga pagtuon nga nagsuporta niini.
Kon dunay balaudnon nga mapasar ang Kongreso, maghatag na kini og gahom sa kapulisan sa pagpatuman sa lakang batok sa vaping. Maayong mapugngan samtang sayo pa.