DILI mominos 141 na ka e-cigarettes o vapes ang nasakmit sa kapulisan sa dakbayan ug lalawigan sa Sugbo kagahapon, Huwebes, Nobiyembre 21.
Ang Cebu City Police Office (CCPO) mihingusog sa pagpang-imbargo niini nga gigamit sa mga publikong lugar diin moabot na sa 81 ang ilang nasakmit apan pulos lang pasidaan ang ilang gihimo sa pagkakaron.
Sa dakbayan sa Mandaue, nikabat og pito ug sa lalawigan nikabat og 53 ang ilang nasakmit. Sa kinatibuk-an, nikabat na kini og 141 ka e-cigarettes ug vapes.
Si P/Brig. Gen. Valeriano de Leon, direktor sa Police Regional Office (PRO) 7, nimando sa iyang mga sakop nga tumanon ang mando ni Presidente Rodrigo Duterte nga ipadakop ang masakpan nga naggamit og vape.
Wala lang una modakop ang mga sakop sa CCPO. Ang ilang gihimo mao lang ang pagpasidaan kanila nga lakip na ang vape sa idili nga ipagamit sa mga pampublikong lugar.
Sa siyudad sa Sugbo nakaimbargo dayon sila og 81 ka mga vapes. Naabtan nila nga nanigarilyo ogelectronic nga klase sa sigarilyo sa publikong lugar.
Ang labing daghan nga nakasakmit mao ang Mabolo police station. Naa ang sentro sa patigayon ug gisundan kini sa Waterfront police station tungod sa kadaghan sa nanigarilyo sa mga dapit nga hugot nga gidili nga manigarilyo.
Matod ni P/Col. Geovanie Maines, Cebu City Police Office (CCPO) in-charge, ang gimando kanila sa ilang labaw mao lang ang pagpahinumdom sa mga migamit sa vapes nga gidili na kini ilabi na sa mga publikong dapit ug kinahanglan nga imbargohon.
Ang konseho sa siyudad sa Sugbo nagplano nga moduso og resulosyon sunod semana nga session ang pagdili sa paggamit sa e-cigarettes sa tibuok dakbayan.
Matod ni Konsehal Dave Tumulak, kon adunay basehanan nga makadaot gyud ang paggamit sa vape, angayan lang nga sundon ang pagdili sa paggamit niini sa publikong lugar.
Sa pagkakaron nga wala pa maklaro ang balaod kung apil ba ang e-cigarettes nga dakpunon tungod kay ang ordinansa sa siyudad ang gidili lang mao kadtong sigarilyo nga adunay tabako.
“Unsaon pagdakop ana nga wala man kay balaod pagdakop ana,” matod Tumulak.
Apan kung aduna nay ordinansa sa siyudad nga magdili sa e-cigarettes dinhi, mahimong makasikop og tawo ang kapulisan, matod ni Tumulak, kinsa chairman sa peace and order council sa dakbayan. (AYB)