Titulo sa yuta ang gipangayo sa mga sakop sa urban poor

KAPUNONGAN sa urban poor sa dakbayan sa Mandaue niawhag kang Mayor Jonas Cortes nga iuli ang titulo sa 9.2 hectares nga luna ngadto kanila nga beneficiaries.

Apan, si Atty. Francisco Amit sa Housing and Urban Development Office (HUDO) nikuwestiyon sa katuyoan sa kapunongan sanglit igo lang sila nagrepresentar sa urban poor beneficiaries.

Si Joselito Dahil, presidente sa LTCUPAI nga nasakop sa Federation of Mandaue City Urban Poor Inc. (Fedmacupi), ang ilang kapunongan gawas sa ilang tinguha sa pagbakwi sa titulo buot niini nga aduna silay representante sa Beneficiary Selection Committee sa HUDO.

Nipahibawo ang pundok sa Fedmacupi nga niadtong Pebrero 4, 1998 gi-award ni kanhi mayor Alfredo Ouano ang mao nga luna alang sa socialized housing project.

Wa gilayon mapahimusli ang maong luna ilabi na nga aduna pay mga existing nga balay nga nasud sa 9.2 ka ektarya.

Apan niadtong 2008 sa gihimong survey, adunay mga Fedmacupi member ang wa na masakop sa mga lehitimo nga beneficiary.

Hinungdan nga gisang-at sa kapunongan ang reklamo sa korte sa reklamong ‘Surrender of owner’s duplicate of title’ batok niadtong pari nga giingong ilang gipahipos sa titulo gumikan sa iyang pagsalig niini.

Ang maong pari nihatag sa titulo ngadto sa city government atol na sa administrasyon ni Mayor Cortes.

“Nahulog mi nga gi-disregard na hinuon nga kami maoy tinuoray nga tag-iya sa lote,” matod ni Dahil.

Samtang si Amit nipasabot nga ang Fedmacupi nagtinguha og offsite relocation sanglit buot nila nga ibaligya ang luna sa dakong kantidad aron bahin-bahinon sa ilang mga meyimbro.

Pulong ni Amit nga base sa ilang gihimong survey aduna ray 54 ka mga actual occupant nga sakop sa Fedmacupi nga nisukwahi sa ilang pangangkon nga kapin sa 100.

Gitataw usab ni Amit nga ang matag opisyal sa homeowners association automatic nga sakop sa ilang selection committee. (FVQ )

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph